Oarsoaldeko Hitza

Arrantzaleen auzoko obretan etzitik aurrera beste urrats bat emango dutela jakinarazi du Udalak prentsa ohar bidez. Esan dutenez, makinak Pobladoko pistan sartuko dituzte, eta ondorioz, han izaten diren aparkalekuak desagertuko dira. Edonola ere, Udalak dio lanak aurrera doazen neurrian aparkatzeko beste plaza batzuk atonduko dituztela han bertan.

Izan ere, lanak bukatzerakoan pistaren erdian aparkalekuak ezarriko baitituzte, eta beste erdian, parkea, aisialdiaz gozatu ahal izateko beharrezko guztiekin atondua.

Udalaren arabera, lanak «oso erritmo onean doaz». Daniel de Castelao kalearen urbanizazioa nolakoa izango den honez gero antzeman daitekeela esan dute.

Laster, Kanpitxo

Han bukatzerako Kanpitxon lanean hasteko moduan izango dira. Udalak jakinarazi duenez, obraren zuzendaritzak laster helaraziko die Kanpitxo kalerako behin betiko proposamena. Urrats hori emanda Kanpitxon lanean hasteko unea izango da.

Eragozpenengatik barkamenak

Prentsa ohar berean, Alkatetzatik aldez aurretik barkamena eskatu diete han inguruan bizi diren bizilagunei. «Mota honetako obra batean asko izaten dira oztopoak eta kalteak, batez ere bertan bizi direnentzat; horregatik berriz ere barkamenak aurretik eskatu eta pazientzia pixka bat izatea espero dugu», esan dute.