Oarsoaldeko Hitza

Bihar hasiko da Bidasoako Itzulia eta aurten, lau etapak Oiartzundik pasatuko dira. Hauetako bat, gainera, herrian hasi eta bukatuko da.

Lasterketen ondorioz, bihartik hilaren 10a arte, egunero trafikoan bide mozketak izango dira.

1958an hasi ziren afizionatu mailako proba hau egiten.

Bide mozketak

Antolatzaileek eman dituzte trafikoan aldaketak izango diren ordutegiak, gutxi gorabehera. Ordu horietan pasatuko dira txirrindulariak Oiartzundik.

Bihar, 14:00etan eta 16:45ean izango dira mozketak. Etzi, hilak 8, 17:15ean.

Hilaren 10ean, larunbatean, izango da Bidasoako Itzuliko azken etapa. Egun horretan, 15:30ean, 16:45ean eta 17:30ean izango dira bide mozketak.

Oiartzun-Oiartzun etapa

Ostiralean, hilak 9, izango da Oiartzunen hasi eta bukatuko den etapa.

14:30ean abiatuko dira txirrindulariak Doneztebe plazatik, baina goizetik hasiko dira prestaketak egiten. 13:00etarako, talde guztiak dagoeneko Oiartzunen egongo dira.

Bidea Ugaldetxo aldera abiatuko da, horregatik, ordubetez itxita egongo dira plaza ingurua eta Yon Oñatibia kalearen zati bat.

17:00ak aldera bukatuko da etapa, baita ere Doneztebe plazan. Orduan Rafael Pikabea, Elorrondo eta Manuel Lekuona kaleak itxiko dituzte.

Etapa bukatutakoan, dopin kontrola egingo diete txirrindulari guztiei, eta Doneztebe plazan bertanizango da sari banaketa.

Perurenari omenaldia

Era berean, ostiralean Txomin Perurena txirrindulari ohiari omenaldia egingo diote udaletxean.

Perurenak txirrindulari profesional izan zen urteetan lortutako sari guztiak Udalaren esku utziko ditu. Hori dela eta, esker ona agertzeko egingo diote omenaldia udal arduradunek. 19:00etan hasiko da ekitaldia.