Oarsoaldeko Hitza

Datorren astean, hilaren 12tik 16ra, autobusez beharrean, oinbusez joango dira ikasleak ikastetxeetara. Hau da, autobusa hartu beharrean, oinezko taldeetan joango dira ikastetxeetara.

Udalak azaldu duenez, helburu nagusia «segurtasunez eta ahalik ea modu iraunkorrenean ikastetxera oinez joateko ohitura berreskuratzea da».

Bi Oinbus izango dira: bata Altzibartik aterako da eta bestea Ugaldetxotik.

Ikastetxe inguruak, itxita

Oinbus ekimenak irauten duen bitartean, 08:00etatik 09:15era itxita egongo dira Haurtzaro eta Elizalde inguruak.

Guztira, 1.500 bat ikasle biltzen dira ordu horietan ikastetxeen sarreretan. Ekimenak, honela, bigarren helburua beteko du: «Auto pilaketa izugarria izaten den garai hori arintzea», azaldu du Udalak.

Mendi Enara Elkartea arduratuko da dena antolatzeaz. Bertako langilea da Oneka Zapirain: «Beste herri batzuetan antzeko ekimenak egin izan dituzte, baina guk Altzako eredua hartu dugu».

Altzan duela hainbat urte hasi ziren ekimena egiten, eta oraindik jarraitzen dute. «Emaitzekin pozik daude».

Gurasoen laguntza

Oinbusak martxan jartzeko, ikastetxeetako gurasoen laguntza ere beharrezkoa da.

Ikastetxeetako idazkaritzetan eman dezakete izena ikasleei oinbusean laguntzeko prest dauden gurasoek. Oinbusean parte hartuko duten ikasleek ere izena eman behar dute.

Ugaldetxo eta Altzibar

Oinbusa bi auzotatik bakarrik egingo dute. «Karrika, Ergoien, Gurutze... bezalako auzoetatik ikastetxeetarako bidea oraindik ez da segurua, askotan espaloiak falta direlako; eta denbora ere gehiago beharko lukete iristeko» kontatu du Zapirainek. «Baina Altzibartik eta Ugaldetxotik ekimena egin litekeela iruditzen zaigu».

Goizez egingo dute Oinbusaren ekimena, «arratsaldeetan zailagoa baita, ikasle askok eskolaz kanpoko jarduerak egiten dituztelako».

Ezohiko udalbatzarra

Oinbus ekimena Eskola Agendaren baitan kokatuta dago. Udalak eta herriko bi ikastetxeek elkarlanean urtero lantzen dute ingurumenaren inguruko gairen bat eta aurten, mugikortasuna izan da.

Horrez gain, hilaren 23an mugikortasunaren inguruko eskaera zehatzak eramango dizkiete Haurtzaro eta Elizaldeko ikasleek udal ordezkariei. Horregatik, ez ohiko batzarraldi bat egingo dute.

Herriko hainbat komertzioren laguntza ere jaso du Oinbus ekimenak.