Oarsoaldeko Hitza

Trintxerpeko Ziriza Etxearen inguruan «erabakiak hartu» behar direla esan du Arantza Tapia Gipuzkoako Foru Aldundiko Lurralde Antolamendu diputatuak, «azpiegitura horrek La Herrerako planeamendu orokorrean izan behar duen tokia zehazteko». Hein berean, Donibaneko Nabalaldeara kamioien joan-etorria handia izango delako, «eta lezoarren bizi-kalitatea hobetzeko», Lezo eta Donibane, portuaren gainetik joango den saihesbidearekin errepidez lotzeko asmoa agertu du Tapiak.

Gipuzkoako Batzar Nagusietan atzo goizean eginiko agerraldian eman zituen azalpen hauek Arantza Tapiak. Zirizaren inguruan, «La Herreraren antolamendua bere osotasunean» aztertu behar dela iradoki zuen Lurralde Antolamendu diputatuak, eta zonalde hartan egin beharreko antolamenduan kultur azpiegituren beharra azpimarratu bazuen ere, Ziriza ren inguruan «dagoen tokiagatik, zalantzak ditugu», esan zuen: «Pasaiako Udalarekin hitz egin behar dugu, eta erabaki bat hartu». La Herreraren hirigintza-ordenazioa Pasaiako Udalari dagokiola onartu zuen Tapiak.

Aukera ezberdinak

Erabaki hori hartzeko, hainbat eskenatoki aurreikusi zituen atzo Tapiak: «Ziriza berritzea, 2007ko martxoan Pasaiako Udalarekin sinatutako hitzarmenaren harira, eta aurrerago La Herrerako planeamendu orokorrean zein toki duen hausnartu; edo Ziriza bota, ondoren kultur ekipamendu bat egiteko». Ziriza Etxea, «sukalde erdian dagoen zutabe batekin» alderatu zuen Tapiak.

Gai horrekin, Lore Suarez PSE-EEko ordezkariak gogora ekarri zuen, Zirizan egin beharreko lanak egiten ez badira, Urban iturrietako dirua galduko dela. Aldi berean, EB-Berdeko Arantza Gonzalez Zirizaren inguruko Aldundiaren «kriterio aldaketarekin» ez zen ados agertu, eta Pasaiak kultur azpiegitura hori behar duela aldarrikatu zuen, «bizitza kulturala handia delako».

Termikaz

PPko ordezkari Juan Carlos Canok galdera egin zion Arantza Tapiari Donibaneko zentral termikoaren «jardueraren inguruko berririk» ote dagoen galdetzeko. «2022ra arte du kontzesioa Iberdrolak. Egun, Gipuzkoak behar duen energia elektrikoaren %30a sortzen du Donibaneko zentral termikoak. Egia da ez dagoela toki egokian, baina ezin dugu energia arloan beste herrialdeen menpe egon. Beharrezkoa da zentralak sortzen duen energia», erantzun zion Tapiak. 2015ean kutsadura neurriak zeintzuk diren «berraztertu beharko dela» gaineratu zuen Tapiak, eta «energia garbien aldeko apustua» egiten ari direla.

Pasaiako Udalarekin harremana

PPko Juan Carlos Canok, Tapiak Pasaiako Udalarekin duen harremana zein den jakin nahi izan zuen. «Egia da desadostasunak ditugula. Baina gure bidea adostasunaren bidea da. Bihar bertan [gaur] bilera bat dut Pasaiako alkatearekin», erantzun zion Tapiak.