Oarsoaldeko Hitza

Mikel Odriozola bosgarren izan zen herenegun jokatu zen 50 kilometro ibilketako Munduko Txapelketan. Lan bikain horri esker, errenteriarrak Pekingo Olinpiar Jokoetarako txartela eskuratu du.

Cheboksaryn (Errusia) jokatu zen proban etxeko atletak izan ziren onenak. Erakustaldia eman zuten, lehen bi postuetan sailkatuta. Denis Nizhegorodovek, gainera, munduko errekor berria ezarri zuen, 3 ordu 34 minutu eta 14 segundoko denborarekin. Odriozolak, berriz, 3 ordu 47 minutu eta 30 segundoko behar izan zituen 50 kilometroak osatzeko.

«Postu bikaina da, eta Olinpiar Jokoetarako txartela eman dit», azaldu zuen amaieran Odriozolak, baina ez zen guztiz gustura. «Ez ditut sentsazio onak izan», gaineratu zuen.Horrez gain, podiumean sartzean ia ezinezkoa zela azaldu zuen. «Errusiarrak maila ikaragarrian daude; sasoiko daude. Ikusiko dugu Pekinen nola dauden».

Odriozola, ausart

Proba hasieratik Alex Schwazer italiarrak eta Odriozolak bera tropeletik aurrera egin zuten. Lehen bost kilometroak 22:28an egin zituen errenteriarrak, eta italiarrak ezin izan zion erritmoari eutsi. Atzetik errusiarrak erritmoa bizitzen hasi ziren. Odriozolak, ordea, bere erritmoari eutsi zion, amaieran bete ez zedin, eta errusiarrek EATko atletarekin bat egin zuten. 10. kilometroak lau errusiarrek erasoa jo zuten, eta errenteriarrak ezin izan zuen erantzun. Errusiarrak txapelketaren bila zihoazen zuzen-zuzenean, eta Odriozola zortzigarren zen. Indarrak neurtzearen taktikak, baina, eragina izan zuen, eta bi postu aurreratuta bosgarren helmugaratu zen.

Bigarrenez, Olinpiar Jokoetan

Mikel Odriozola bigarrenez ariko da Olinpiar Jokoetan. 2000. urtean Sidneyn (Australia) aritu zen, eta 24. sailkatu zen. 2004an, Espainiako Atletismo Federazioaren erabaki eztabaidagarriak Atenasen lehiatzea eragotzi zion. Aurten, beste aukera bat izango du.