Oarsoaldeko Hitza

Aralarrek gaur egun San Markoko zabortegian dagoen lekuan aisialdirako parke bat eraikitzeko eskatu du. Horretarako ezinbestekotzat jo ditu, Errenteriako Udalaren eta herriko alderdi guztien inplikazioa.

Herritarren inplikazioa ere oso garrantzitsua izango dela azaldu zuen atzo egindako agerraldian Iñigo Imaz Aralarreko kideak. «Guztiok bat eginik egon behar dugu hurrengo hilabeteetan 2009an zabortegia itxita egon dadin, eta San Markon gune berde bat eta aisialdirako parke bat eraikin dadin urratsak emanez». Horretarako, Aralarrek Errenteria-Oreretako Plan Orokorrean San Marko gune berde izendatzea eskatu zuen «gaur (atzo) bertan».

Kanpaina abian

Aralarrek proposamena ezagutzera emateko kanpaina bat jarri du abian. «Hainbat ekimen jarriko ditugu martxan», azaldu zuen Imazek. Astebete barru hitzaldi bat emango dutela iragarri dute proposamena aurkezteko eta informazio gehiago emateko. «Batzar Nagusietan aurkeztu genuen itxiera plana azaltzeko hitzaldi bat antolatuko dugu». Horrez gain, beste alderdiei «aktiboki parte hartzeko» eskatu diete. «Guk gure proposamena daukagu, beste alderdiei, gurearekin ados ez badaude, beren plan propioa aurkezteko eskatzen diegu», gaineratu dute.

Bestalde zabortegiak sortzen duen kutsaduraren inguruan ere mintzo zen Imaz. «Eusko Legebiltzarrean erantzun digute ez dagoela Beraungo auzoan dauden osasun eta kutsadura ezberdinen inguruko ikerketarik eginda. Beraz, ikerketa horiek egin daitezela eskatuko dugu».

Itxiera iragarpenekin kexu

Iñigo Imazek San Markoko zabortegiaren inguruan egindako itxiera iragarpenak kritikatu zituen. «2006ko abenduaren 31n itxiko zela esan zuten lehen aldiz. 2007ko martxoa eta urrian ondoren, baita 2008ko martxoaren 31n... Gure galdera da, noiz arte? Guk duela bi urte esan bezala 2009ra arte?».

Bukatzeko lanean jarraituko dutela iragarri zuten. «Argi geratzea nahi dugu ez garela isilik geratuko erantzukizuna duten erakundeei lanean jar daitezela eskatzeko orduan. Eta ekimen gehiago jarriko ditugu martxan zabortegia eta transferentzia estazioa San Markotik kendu dadin», azaldu zuen Imazek.