Oarsoaldeko Hitza

Haurtzaro Ikastolako eta Elizalde Herri Eskolako hamarnaka ikasle aste osoan zehar oinez joan dira ikastetxeetara Altzibartik eta Ugaldetxotik, Oinbus ekimenaren baitan.

Tipi-tapa ere joan daiteke ikastetxeetara. Autobusak, autoak, bizikletak, trenak... haien pareko garraiobideak dira norberaren oinak ere.

Oinbus ekimena da. Haurtzaro Ikastolara eta Elizalde Herri Eskolara astebetez bada ere, oinez joateko ekimena. Ikasleen artean garraio iraunkorra sustatzeko modua da.

Puntu-puntuan eskolara

Altzibartik 08:40tan puntu-puntuan abiatzen dira Elizaldera doazen ikasleak, lauzpabost gurasoren laguntzarekin. «Abiatu behar dugu», zioten gurasoek erlojuei erreparatuz.

Hamar bat ikasle joan dira oinez egunero, baina atzo oraindik ikasle berriak gehitzen ari ziren ekimenera.

Haurrak kontent abiatu ziren eskolara, guraso bana aurrean eta atzean, bidea segurtasunez pasatzeko.

Bide seguruak

Altzibartik, bidegorriz joaten dira. Bidea bitan zeharkatu behar dute: espaloiz aldatzeko Altzibarren bertan eta eskolara sartzeko, gero.

Gehientsuenak LHko ikasleak ziren, baina bazeuden DBHko eta HHko batzuk ere.

Kontzientziazioaren adibidea, akaso, Karrikako familia batek erakutsi zuen: autoa Altzibarren utzi eta oinez joan ziren eskolara.

Talde handiak

Ekimenean parte hartzen duten ikasleek Oinbuseko kide direla dioen txartel bana daramate lepotik zintzilik.

Lau talde daude ekimenean, bina Altzibartik eta Ugaldetxotik. Talde handienean, 58 bat ikasle bildu dira. Ugaldetxotik Haurtzaro Ikastolara joan den taldea izan da.

«Erantzun ona»

Oraindik ez dute ekimenaren balorazio behin betikoa egin, baina, Oneka Zapirain antolatzailea, bederen, «pozik» dago.

«Erantzuna ona izan da», kontatu du, «egunak aurrera joan ahala gero eta ikasle gehiagok eman dute izena».

Eguraldiaren baitan ere, taldeak handitu edo txikitu egin direla baieztatu du Zapirainek.

Erosora ohituta daudenek, hasieran ikastetxe inguruak autoentzako ixtea nahiko gaizki ikusi zutela kontatzendute, baina onartzen bukatu dutela.

Izan ere, aste honetan goizez galarazita egon da ikastolara eta eskolara autoz iristea. Eta, egia guztia aitortu behar da, horrek Elorsoro kiroldegiaren inguruan trafikoa gehitu du.