Oarsoaldeko Hitza

Pasaiako Portuko Agintaritzako Lan Arriskuen Prebentziorako delegatuek salatu dute Erlojuaren Kaian txatarra lehorreratzeko eta gordetzeko orduan arriskuak daudela. Bertatik jakitera eman dutenez, hiru urte dira txatarra bertan nola uzten duten salatzen dutela. Aste honetan, esaterako, pankartak jarri dituzte zonalde horretan, eta «Portuko zonalde beltz» bezala izendatu dute.

Pasaiako Portuko Agintaritzako Lan Arriskuen Prebentziorako delegatuen ustez, «guztiz arriskutsua da txatarra Erlojuaren Kaian nola uzten duten». Honek sortzen dituen hauts eta soinu bortitzez gain, askotan, txatarra puskak hau uzteko eremutik ateratzen da. Gainera, zati txikiak Eskalerillaseko bidera ateratzen direla jakinarazi dute, «eta batzuetan, errepideraino iritsi dira txatarra zati txikiak».

Adi ibiltzeko deia

Erlojuaren Kaiaren ingurutik igarotzen diren oinezkoak edo ibilgailuak «arriskuan» daudela iritzi diote Portuko ordezkariek: «Puntu beltz honen berri eman nahi diegu bertatik pasatzen diren guztiei, txatarra haien gainera erortzeko arriskua dagoelako».

Guzti horregatik, dei egin diete txatarraren lehorreratzean eta gordetzeko orduan ardura dutenei, jardun hau modu egokian egin dezaten.