Oarsoaldeko Hitza

Kaputxinoetako igerilekuak guztiz berrituko dituzte. Proiektuak bi fase izango ditu, zeinak 4,5 milioi euroko balioa izango duten guztira. 2010 urteko ekainerako zabaltzea aurreikusi du Errenteriako Udalak proiektuaren aurkezpenean.

Proiektu berriak ez du zerikusirik egun igerilekuak duten itxurarekin. «Proiektu erabat berritzailea da», azaldu zuen Jose Angel Rodriguez Kirol zinegotziak. Laster hasiko dira egungo igerilekuan eraispen lanak, eta beraz, aurtengo udan herritarrek ezin izango dute bertako igerilekuez gozatu. «Kalte-ordain gisa, kaltetutako bizilagunek Fanderiako igerilekuetan sarrera dohainik izango dute», azaldu du Rodriguezek.

Guneak duen aldapa baliatuz hiru igerilekuak maila ezberdinetan egongo dira. Horiez gain, estalita egongo den 25 metroko igerileku bat ere eraikiko da. «Urtean zehar erabilera emateko aukera emango die bizilagunei», azaldu du Kirol zinegotziak. Berdegune zabalak izango dira, eta baita, kafetegi, terraza, aldagela... berriak ere. «Instalakuntzak oso modernoak izango dira», gaineratu du Rodriguezek.

Bi fase izango ditu lanak

Bi fase izango dituzte lanek: lehenengoan, kafetegia eraitsiko da eta berria egin, baita estali gabeko igerilekuak ere. Honek 3 milioi euro balioko ditu. Bigarren fasean, estalitako igerilekua egingo da, eta 1,5 milioi euro kostatuko du.

Lan guzti hauek 2010eko ekainerako amaitzea aurreikusi dute. «Halako lan erraldoi batean apur bat berandutzea gerta liteke», argitu du Joseba Etxarte Hirigintza zinegotziak.

Koste handiko proiektua izanik Errenteriako Udalak finantziazio iturri ezberdinen bila ari dela azaldu du Jose Angel Rodriguezek. «Gipuzkoako Foru Aldundian aurkeztu dugu proiektua, baita Madrilen ere».

Antxon Pagolaren proiektua

XLark arkitekto gabinetea arduratu da diseinua egiteaz, zehazki Antxon Pagola arduratu da hortaz.

Bestalde, igerilekuen ondoan dagoen Esnabide kalean ere egokitze lanak ari dira egiten. Ondorioz, arazoren bat edo beste izango zela azaldu du Rodriguezek. «Igerilekuan behin eta berriz garbitzen egon beharko genuke, eta horregatik iruditu zaigu momentu aproposena dela igerilekuen berrikuntza lanak egiteko».