Oarsoaldeko Hitza

20:00etatik aurrera izango da. Jose Manuel Azkue organista oiartzuarrak, kontzertua emango du gaur San Pedroko Pedro Deuna elizan. Kontzertua Ondartxo Abesbatzak bere XXV. urteurrena ospatzeko antolatutako egitarauaren baitan kokatzen da.

Jose Manuel Azkue, Donostiako Koruko Andra Mariaren Basilikako organista ofiziala da, eta itzal handia lortu du bere ibilbide profesionalean, hemen eta nazioartean. Josu Elberdin, Trintxerpeko Karmengo Amako organista eta Pasaia Musikal eskolan organo irakasleak, «maisu ikaragarri handia» dela esan du: «Urte asko daramatza organoa jotzen. Estatu Batuetan ere aritu da klaseak ematen eta esperientzia handiko gizona da».

Ondartxok bere XXV. urteurrenean «egiten ari den ahalegin handia» eskertu du, bide batez, Elberdinek «San Pedrora eta Pasaiara kalitatezko gauzak» ekartzen ari direlako.

«Aukera paregabetzat» jo du Elberdinek gaurkoa eta jendeari kontzertura biltzeko deia luzatu dio: «Konparazio baterako, uztailean Bruce Springsteen Donostiara etortzekoa da. Horrelako zerbait, baina musika klasikoan eta organo munduan Azkue izan daiteke, beraz, jendeak ez dezala aukerarik galdu, ikaragarrizko musikari garrantzitsua baita».

Pantaila bidez ikusteko aukera

Cavaille Coll bat da Pedro Deuna elizako organoa, gaian adituen arabera «harribitxia». Elizako goialdean dago, eta horregatik Ondartxo Abesbatzak «kontzertua jarraitzea errazagoa» izan dadin, pantaila bidez proiektatuko du kontzertua. Azkuek, musikagile handienen piezak interpretatuko ditu gaurko kontzertuan, besteak beste, Bach, Haydn eta Gorritirenak.

Oragonista oiartzuarrak San Pedron jotzen duen bigarren aldia da, Ondartxo Abesbatzak antolatutako lehen Musika Astean jo baitzuen ere bai.