Oarsoaldeko Hitza

Xabier Oleagak, Joan Mari Torrealdaik eta Txema Auzmendik 'Egunkaria Auzia'-ri buruzko hitzaldia eman zuten herenegun. Xenpelar Etxea jendez lepo bete zen hitzaldia entzuteko.

Herenegun bost urte eta hiru hilabete bete ziren Guardia Zibilak Euskaldunon Egunkaria itxi zuenetik, eta data seinalatu hori gaiaren inguruko hitzaldia emateko baliatu zuen Egunkariaren Aldeko Elkarteak. Xenpelar Aretoan izan zen ekitaldia, eta 50 lagun inguru elkartu ziren Xabier Oleagaren, Joan Mari Torrealdairen eta Txema Auzmendiren hitzaldia entzutera.

Hitzaldia eman zuten hiru euskaltzaleak Egunkaria Auziko bi sumarioetan auzipetuta daude, beste bederatzi lagunekin batera. Bakoitzarentzako 26 urteko espetxe zigorra eta milaka eurotako isuna eskatu dute. «Egunkaria Auzian gaizki egin diren gauza guztiak aipatzeak luzeegi joko luke, baina hurrengo adibide honek dena laburbiltzen du: atxilotu gintuztenean, ETAko kide eta ETAko kolaboratzaile izatea leporatu ziguten, aldi berean. Horrek ez du zentzurik. ETAko kide edo ETAko kolaboratzaile izan zaitezke, baina biak batera ezinezkoa da. Zentzugabekeria erraldoi baten hasiera besterik ez zen izan hori», azpimarratu zuen atzoko hitzaldian Txema Auzmendik.



Epaiketaren zain

Bost urte geroago epaiketaren zain daude atzoko hitzaldiko protagonistak. Egunkaria itxi ondoren, ez zela «ezer frogatu» onartu zuen fiskalak, baina AVTeta Dignidad y Justicia elkarteek akusazioa partikular bezala aurkeztea erabaki zuten. Xabier Oleagaren esanetan, «akusazio horretako tesia irakurtzeak azala kizkurtzen du. Tesia garbia da: Espainiako Erresumako Konstituzioak babesten du euskara. Espainiako Gobernuak, Nafarroako eta EAEko autonomia estatutuek babesten dute euskara. Hortik kanpo geratzen den guztia ETA da. Zertara dator, beraz, erakunde sozialak euskara eta euskal kulturaz arduratzea, ETAren helburuetara jartzeko ez bada?».

Justiziarik ez dute espero

Auzitegi Nazionalak emango duen epaian ez dute itxaropen handirik Oleagak , Torrealdaik eta Auzmendik. «Estatuaren izenean, atxilotu, torturatu eta frogarik gabe akusatu gaituzte. Hori egin dutenen aldetik ez dut justiziarik espero», onartu zuen Auzmendik.

Aurrera begira zer gertatuko den ez daki Torrealdaik, baina auziaren sustatzaileek orain arte zer lortu duten argi dauka: «Batetik, bost urte hauetan auziperatuek ezin izan dugu euskal kulturaren aldeko tajuzko lanik egin. Anulatu egin gaituzte. Bestetik, euskararen mundua kakaztea lortu dute. Euskara eta ETA lotzea. Dena den, euskararen alde lanean ari direnak orain arte bezala jarrai dezatela».