Oarsoaldeko Hitza

Force 17 ontzia desegiteko lanetan hasi dira egunotan berriz ere. Garabi baten laguntzaz ontziaren zatiak ateratzen ari dira, pisu handia baitute.

Orain aste batzuk lekuz aldatu zuten Force 17-a, desegiteko asmoz, baina lekualdaketa horretan ontziak kroskoa kolpatu eta zuloa ireki zen. Horren ondorioz, hondoratu egin zen.

Gertaera hori izan zenean adituak zer egin aztertzen egon ziren eta bi aukera posible ikusten zituzten: batetik, ontzia garabien laguntzaz lehorrera ateratzea eta bertan desegin, eta bestetik, ontzia bi zatitan puskatu eta hondoak jo zuen tokian bertan txikitu. Oraingoz, ontzia ez dute bitan zatitu eta bertatik ari dira zatiak ateratzen.

Isuritako likidoa

Kolpearen ondorioz, isuria egon ote zitekeen zalantzan jarri zen. Portuko Zuzendariak, Goio Irigoienek, ontziaren inguruan ikus zitekeen likidoa «motoreen arrastoak» besterik ez zela adierazi zuen. Ontzia hondoratu eta hurrengo egunean Itsas Kapitagintzak kutsaduraren kontrako hesiak jartzeko agindua eman zuen.

Zazpi urte pasatxo

Force 17 ontzia Pasaiako Portura ekarri zuten konpontzeko asmoz, baina inor ez da ontziaren kargu egin, hortaz, ontzia Espainiar Estatuko lur-eremuan dagoenez, Espainiar Estatua da jabea. Gauza bat eta beste, azkenean zazpi urte baino gehiago egon da ontzia Pasaiako Portuan geldirik.