Oarsoaldeko Hitza

Igandean izango da Itsas Mendik antolatutako XVIII. Musika Jardunaldien lehen kontzertua. Eguerdian, Donibaneko plazan, Konstantzia Musika Bandak joko du. Urteetan bandako zuzendari izandako Pedro Etxeberria Pedrotxo gogoratzeko kontzertua izango da, berezia, herriko jende askok parte hartuko duelako. Izan ere, herritarrek osatutako abesbatza batek, egun berean, Robustiano Olaziregiren bertsoak kantatuko baititu, hain zuzen, Konstantzia Bandak orain dela 105 urte Eibarren banden lehiaketa irabazi zuenekoa gogoratzen dituzten bertsoak, Atozte bada, atozte bada izenekoak.

Maiatzerako antolatu duten kontzerturik bereziena izango da igandekoa, baina ez bakarra. Hilaren 30ean, Donostiako Ama Lur Koralak abestuko du Bonantzako elizan, eta hilaren 31n, aldiz, Donostiako Kamara Koralak, Joan Bataiatzailearen elizan.

Elizako organoaren mendeurrena ospatu

Aurten ehun urte beteko ditu Donibaneko Joan Bataiatzailearen elizan dagoen organoak, eta Itsas Mendiko kideek ez dute aukera galdu nahi izan urteurrena merezi bezala ospatzeko.

Aquilino Amezuak eraiki zuen Donibaneko organoa, garai hartako organo egile ospetsuenetakoak. Donibanera ekarri zuteneko fakturan ikus daitekeenez, garaiko 17.000 pezeta ordaindu zituzten organoaren truke. Ehun urte hauetan, bi aldaketa nagusi ezagutu ditu organoak: 1935 urtean, haizagailua eta motorra jarri zizkioten, eta ondoren, tokiz aldatu zuten. Elizaren goialdeko albo batean izatetik, erdi-erdian izatera pasatu zen, Pedrotxok berak hala gomendatuta.

Halako organoaren mendeurrena ospatzeko, baina, organo kontzertuak baino ezin eskaintza aproposagorik, eta horretan jarri dute indarra aurten Itsas Mendikoek. Oraingoz ekainean egingo diren bi kontzertuak iragarri dituzte, baina urtean zehar gehiago egingo dituztela esan dute. Ekainaren 1ean Oscar Candeno Zabalak joko du organoa, eta ekainaren 7an, Aitor Olea Juaristik.

Iragarritako kontzertu guztiak doan dira, hil honetakoak, zein ekainekoak.