Oarsoaldeko Hitza

Askok eta askok telebistan atera izan diren telesailetatik ezagutuko dute Ane Gabarain (1963, Donostia) aktorea. Hala ere, hamaika antzezlan taularatutakoa da, eta gaur, Gezala Auditoriumean, 20:00etan, Lierni Fresnedo aktorearekin batera hamar euroren truke Gaurko Menua aurkeztuko dute herritarren aurrean.

Zenbat urte daramatzazu antzerkian?

Hogeitabost urte inguru. 19 urtekin hasi nintzen antzerkian, ikasketak bukatu ondoren. Garai hartan Eusko Jaurlaritzak sortu berri zuen Antzerki antzerki eskolan hasi nintzen eta bertan nire belaunaldiko aktore eta zuzendari gehienak ezagutu nituen: Carlos Zabala, Eneko Olasagasti, Candido Uranga, Elena Irureta, Aitzpea Goenaga, Klara Badiola... denak hor ginen pil-pilean.

Telebistan ere sarritan aritu zara?

Bai, telesail askotan. Hala ere, Bi eta Bat telesaila niretzako berezia da. Telebistan egindako lehenengo lana izan zen eta produktu oso ona izan zen. Zainduta zegoen alde guztietatik. Orduz geroztik beste hamaika telesail egin ditut.

Telebista ala antzerkia. Zer duzu nahiago?

Lan onak gustatzen zaizkit, ez naiz dikotomia horren zale. Lanak dira onak edo txarrak. Nik uste dut telebista egiten asko disfrutatu daitekeela edo antzerkia egiten asko sufritu.

Gehienetan komedian ikusi zaitugu.

Telebistan telesail komiko asko egin ditudalako da hori. Baina antzerkian denetik egin dut. Hala ere, normala da nire alde komikoa ezagutzea publiko gehienak telebistaren bidez ezagutzen nauelako.

Nolakoa da Gaurko menua?

Bi sukaldari dira protagonistak eta sukalde handi batean egiten dute lan. Bi emakume hauek bizitza miserablea eta ziztrina daramate. Bata amarekin bizi da eta bestea senarrarekin. Bizimodu zaila dute, bi bakardade dira, eta beren bizi poz bakarra kulebroi bat da. Telesaila dela eta ez dela, halako katramila batean sartzen dira eta ezin dute atera. Hor hasten da korapiloa. Antzezlana oso gorabeheratsua da: halako batean barrez ari zara eta gero bat-batean negarrez.

Herritarrek zer topatuko dute antzezlanean?

Menuan denetik topatuko dute, edozeinentzako menua izango da: barazkiak, haragia, arraina, pasta... Dudarik ez dezatela izan eta etor daitezela. Orain arte ikusleek oso ongi pasatu dute.