Oarsoaldeko Hitza

Altzate igerilekuaren inguruko sarbideak eta bertako belardian egoteko guneak egokitzen ari da egunotan Lezoko Udala. Udari begirako neurria da, eta bereziki herritar ezinduek igerileku zerbitzuaz goza dezaten egiten ari dira lan hauek.

Lezoko Udaleko Hirigintza Sailetik jakitera eman dutenez, ezinduentzako irisgarritasun araudia bete dadin egiten ari dira lanak. Izan ere, orain arte, Altzate igerileku ondoko belardian (udan, igerilekuaren estalkia zabaltzen denean, bertan izaten dira igerilekuko erabiltzaileak), zailtasunak zituzten pertsona ezinduek bertatik mugitzeko. Lanak bukatzen dituztenean, beraz, igerilekuak herritar guztientzako behar bezalako zerbitzuak eskainiko ditu.

Hormigoizko bidea

Hirigintza Sailetik jakitera eman dutenez, belarditik zehar, igerilekura iristeko hormigoizko bide bat egin dute. Beraz, gurpildun aulkiak behar dituzten lezoarrek edo bestelako ezintasunak dauzkatenek errazago izango dute igerilekuraino iristea.

Bideak egiteaz gain, atseden lekuak ere egin dituzte igerilekuaren inguruan. Horrela, igerilekuaren inguruan mugitzeko arazoak konpontzeaz gain, bertan dauden bitartean atseden hartzeko edo, besterik gabe, egoteko toki aproposa izango dute ezintasunak dauzkatenek.

Ekainaren 16an, zabalik

Bestalde, Altzate igerilekutik jakitera eman dute udako zerbitzua ekainaren 16tik aurrera zabalik egongo dela. Hau da, eguraldi ona egingo duen bakoitzean igerilekuko estalkia zabalduko dute, eta herritarrek belardian egoteko aukera izango dute, berrikuntzez gozatzeko aukera izanik.