Oarsoaldeko Hitza

Ereintza Elkartearen 50. urteurrenaren baitan ospakizunetan dira sail ezberdinak; datorren astean eskubaloi taldearen txanda izango da. Maialen Arenaza eta Jose Inazio Altube, taldeko bi belaunaldi, Ereintzaz mintzo dira.

Paseak, jaurtiketak, geldiketak, zintak... eskubaloiak ez du aldaketa handirik izan azken 50 urtetan. Ereintzaren Eskubaloi taldeak, berriz, goitik-beherako eraldatzea izan du. Mende erdi honetan 800 jokalari baino gehiago igaro dira talde zuri-gorritik. Horietako birekin izan da OARSOALDEKO HITZA. Bi belaunaldi, bi ikuspegi: Maialen Arenaza eta Jose Inazio Altube dira.

Biak ala biak 13 urterekin hasi zuten beren ibilbidea eskubaloian. «Lehengusuak jokatzen zuenez, ni ere hasi nintzen», onartu du Arenazak. «Ni, berriz, fraileek behartu nindutelako hasi nintzen. Gainera, pibotez jokatzera ere behartu ninduten Telleriko fraileek», ekarri du gogora Altubek.

Jokalari ohi, entrenatzaile, zuzendaritzako kide...

Jose Inazio Altube Ereintza Eskubaloi taldeak eman duen jokalaririk onentsuenetakoa da. Goi mailan aritu zen, onenekin lehian, eta egun Ereintzako zuzendaritzako kide da. 85/86 denboraldian gainera, Ereintza sailkapeneko azken postuetan zen lau jardunaldiren faltan Altube entrenatzaile zela. Alde guztiek, Altubek entrenatzaile eta jokalari papera egin zezala erabaki zuten. Hurrengo partidak irabazi egin zituen Ereintzak, eta mailari eutsi zion. Atzetik, soka luzea ekarri zuten eztabaidak iritsi ziren baina. «Halako mila bitxikeri daude», dio protagonistak.

Maialen Arenazak, ordea, lehen urtea du Ereintzan, ilusio eta gogo biziz dago aurrera egiteko. Cristobal Gamon ikastetxean hasi zen eskubaloian, eta Langaitzen ere aritu ondoren, heldu da urten talde zuri-gorrira. Ereintzaren iragana, oraina eta geroa dira.

Hasiera gogorra

1959an sortu zen ofizialki Ereintza Eskubaloi taldea. Hasiera guztiak bezala gogorra izan zen. Estali gabeko frontoian jokatzen zuten, porteriak, kartelak, zelaiko marrak margotu... jokalariek egiten zituzten. «Gaur egun, jokatu bakarrik egiten dugu», nabarmendu du Arenazak. «Badaude borondatea duten jokalari batzuk, baina agindu ezean jai dago», gaineratu du Altubek. Gaur egun, jolastea gustatzen zaielako bakarrik etortzen direla dio zaharrenak, eta gazteenak hori zalantzan jarri du, «batzuk zeozer egiteagatik etortzen dira».

Ez da Maialen Aranazaren kasua. Kirol hau maite du, eta luzaroan berari lotua jarraitzea espero du. «Maialen bezalakoekin ziurtatuta dugu etorkizuna. Luzaroan jarraituko du kirol honetan, ezta Maialen? Asko maite du kirol hau», dio Altubek, gazteak irri egiten duen bitartean. Ereintzak, gaur egun Lehenengo Nazional Mailan du mutilen taldea, eta neskena, Bigarren Nazional Mailan.

Mende erdi horretan, Lehen Mailan egon zen Ereintzaren mutilen taldea (futbolean Bigarren Maila litzatekeena). «Etorkizunean itzuliko garen? Saiatuko gara noski, baina hori bigarren mailako helbura da guretzat», aitortu du Ereintzako jokalari ohi, eta gaur egungo zuzendaritzako kideak. «Guk, eskubaloiak herrian bizirautea nahi dugu. Gaur egun, Ereintzaren 11 taldeak batuta 160 jokalari inguru ditugu. Hori da gure garaipena», gaineratu du.

Eskubaloiaren osasuna

Ez dira eskubaloiaren garairik onenak, hala dio behintzat Jose Inazio Altubek. Futbolaren inguruak beste kirolei min handia egiten diela uste du. «Gaur egun, jendeak komunikabidetan agertzen diren kirolak aukeratzen ditu. Eta, zenbat orri pasatu behar dira kiroletako sailean eskubaloiaren inguruko albiste bat irakurtzeko?».

90. hamarkada ekarri du gogora, Irungo Elgorriaga Bidasoa Europako txapeldun izan zenekoa. «Lorpen txikiagoak lortuta, presentzia handiago dute. Gure etorkizuna, agintariekin eta komunikabideekin erlazionatuta dago». Maialenek, berriz, «jokatzen jarraitzen den bitartea, ez dela hilko» iritzi du.

Hala ere, guztia ez da beltz kolorekoa, eta emakumeen parte-hartzeari dagokionez, futbolari urtetako aldea ateratzen dietela uste dute biek. «Futbola emakumeentzako ez dela diote, baina eskubaloiarekin ez da hori gertatzen», dio Maialenek. «70. hamarkadan lehen aldiz emakume arteko futbol partida izan zen. Ordurako, eskubaloi taldeak Euskal Ligan jokatzen zuen», berretsi du Altubek.

Eskubaloiaren aldaketa horren isla ere bada Ereintza. «Hasieran, Don Bosco eta Telleri-Alde ziren erreferentziak. Orain gu gara», aitortu du Altubek.