Oarsoaldeko Hitza

Jaia

Intxixu AEK-k antolatuta, XIX. Sagardo Eguna ospatu zen atzo; AHT Gelditu! Elkarlanak egin du txotx aurten

goiatz labandibar

AHT Gelditu! Elkarlanaren izenean, Iban Pikabeak txotxa egin orduko hasi ziren hustutzen sagardo kupelak eta botilak.

Oiartzuarrek puntualtasunik ez dutenaren fama dute, baina atzo erakutsi zuten, nahi dutenean, gutxienez, badakitela aski puntualak izaten.

17:55ean jarrita zegoen txotxaren ordua, eta 18:00etako sei kanpaikadak jo zituztenean San Esteban parrokiako kanpaiek, jaia abian zen. Euriak lagundu ez arren, giroa pixkanaka zabaldu zen plaza inguruan eta inor gutxik uko egin zion uko sagardoa dastatzeari.

Alkoholaren kontsumoa eta gaztetxoak

Dultzaineroek alaitu zuten atzo ere XIX. Sagardo Eguna. Atzokoan, agian baten batek bestelako zuzeneko musika faltan botako zuen, baina Sagardo Egunean, sagardoa bera da protagonista nagusia. Bakarra ez esatearren. «Azken urteetan adin txikikoek alkohola kontsumitzearen kezka dago, eta arrazoi horri irtenbidea ematen saiatzen gara», azaldu dute AEKtik.

Herritarren laguntza

Intxixu AEK-ko kideak, herriko elkarteetako kideen laguntzarekin, gelditu gabe ibili ziren alde batetik bestera. Saioa Ballesteros AEK-ko irakasleak esan bezala, «lan franko izaten dugu, baina laguntza handia ere bai». Pintxoak egiten, sagardoa botatzen... «Oiartzunen jende gehien biltzen duen jaietako bat da, eta polita izaten da», erantsi zuen Ballesterosek.

Sagardo Eguna bukatuta, Girizia Elkartean X. Sagardo Lehiaketa izan zen. Edizio hau ixteko orduan, oraindik irabazlerik ez zegoen.

Askorentzat, jaiak gero Kataxulo Gaztetxian jarraitu zuen, fidantzak ordaintzeko antolatutako kontzertuetan.

Datorren Sagardo Eguna, urtemuga biribila izango da: XX. Sagardo Eguna hain zuzen.