Oarsoaldeko Hitza

Ereintzak antolaturiko Eskubaloia 12 orduz jaialdia ez da larunbat honetan ospatuko. «Arazo teknikoak» direla medio, hilaren 28ra atzeratzea erabaki dute antolatzaileek.

«Jendearekin bat egiteko arazoak izan ditugu, eta horregatik ospakizuna atzeratzea erabaki dugu. Gure asmoa ahalik eta jende gehienak parte hartzea da, eta larunbat honetan festa egin izan bagenu, Ereintzako jokalari historiko asko kanpoan geldituko ziren», azpimarratu du Francisco Javier Barros Ereintza Eskubaloiako kideak.

Atzerapenak sortu dituen arazoengatik eta eragozpenengatik «barkamena» eskatu dute antolatzaileek.

Hilaren 28an egingo dute

Eskubaloia 12 orduz jaialdia, beraz, hilaren 28an izango da. Egun horretan Telleri-Alde ikastetxean mila parte-hartzailetik gertu elkartzea espero dute antolatzaileek: «Egun hauetan batekin eta bestearekin harremanetan jarriko gara, eta 1.000 parte-hartzailetik gertu elkartzea espero dugu», onartu du Barrosek.

Hilaren 28ko festan, eskubaloi partidak hamabi orduz jokatuko dituzte adin guztietako parte-hartzaileek. Tartean, ordea, bazkaltzeko atsedena hartuko dute, eta bazkari hori ere ahalik eta jendetsuena izateko lanean ari dira. Barrosen esanetan, «eskubaloia maite dugun ehunka lagun elkartuko gara, eta , ziur aski, giro bikaina sortuko da».

Bazkarian izena emateko azken eguna hilaren 24a izango da. Bertara joan nahi dutenek 15 euro sartu beharko dituzte Kutxako kontu korronte honetan: 2101 0060 0200 121 289 14.

Ereintza Eskubaloia taldea 1959. urtean sortu zen, eta , orduz geroztik, herriko eskubaloiaren erreferentzia izan da. Hilaren 28ko jaialdia Ereintza Elkartearen 50. urteurreneko ospakizunen baitan antolatu dute.