Oarsoaldeko Hitza

«Birgaitzearen aldeko indarrak metatzeko unea delako». «Une garrantzitsua bizi dugulako, eta beste birgaitze eredu bat posible dela uste dugulako». Aurretik aipatutakoak Pasaiako Elkarteen Koordinakundeko ordezkariek martxaren zergatiak azaltzerakoan botatako argudioak dira. Izan ere, biharko, badiari bira emango dion aldarrikapen martxa deitu baitu Elkarteen Koordinakundeak.

Pasaia bada garaia lelopean badiari bira emateko asmoa agertu dute, «udalerrriaren birgaitzeari lehenbailehen ekin» diezaiotela eskatzeko. San Pedroko Torretik abiatuko dira, 11:00etan. Handik Trintxerperako bidea hartuko dute eta Gernika Plazan egingo dute lehen geldialdia. Martxarako propio landu duten agiria (www.oarsoaldekohitza.info-n osorik) irakurriko dute lehenbizikoz Gernika plazan.

Ondoren, Gomistegirako bidea hartuko dute. Han bira eman eta Eskalerillasetik Antxorako bidea hartuko dute, zati horretan espaloitik. Antxora iristerakoan, barrutiko erdigunera sartuko da martxa, eta Gure Zumardian agiria irakurriko dute bigarrenez.

Antxotik irten eta Donibanera joango dira. Plazara iristerakoan bukatuko da martxa, festa giroan, sardin jatearekin, musikarekin eta sagardoarekin.

Bestelako eredua, herritarren iritzia kontuan hartuko duena

Koordinakundearen arabera, «Pasaiako etorkizuna udalerritik kanpo erabakitzen» ari dira, eta, horregatik, biziberritze prozesuan «pasaitarren protagonismoa» aldarrikatu nahi dute.

«Gure ustez, posible da aurkezten zaigun biziberritze eredua ez den beste eredu bat; posible da eta egingarria da. Soil-soilik, beste eredu horri ekiteko egiazko borondatea behar da», esan dute. Zentzu horretan, «kanpo kairik gabe Pasaiak etorkizunik ez duela» diotenek ezin dezaketela baieztapen hori egin iritzi diote, «badiaren berehalako biziberritzea bera hipotekatzen duela» uste baitute.

«Pasaia bizia, erakargarria, iraunkorra eta modernoa nahi dugu, hain zuzen ere, pasaitarrok zer nahi dugun eta zer ez kontuan hartuko duena», esan dute.

Horregatik guztiagatik, biharko martxa «zabala» izan dadila nahi du Koordinakundeak. Herritar guztiak deitu dituzte parte hartzera, «baita elkarteetako kide ez direnak ere» eta badiari bira osorik ematen ez bada, zati batean parte hartzeko eskatu dute, norbere barrutian, «Korrikarekin egin ohi dugun antzera» esan dute.