Oarsoaldeko Hitza

Gipuzkoako PSE-EEk datorren astelehenean, hilak 9, hasiko du zentsura mozioen prozesua Pasaiako, Hernaniko eta Arrasateko udaletan. Horrela, udal hauetako PSE-EEko ordezkariek gainontzeko alderdi politikoei 10 eguneko epea eman diete prozesua babesteko, «horrela egoki ikusten badute», adierazi dute PSE-EEtik.

Atzo goizean Donostian izandako agerraldian, Iñaki Arriola Gipuzkoako PSE-EEko idazkari nagusiak adierazi zuen aipatutako udaletan «formazio sozialistari» dagokiola mozioa aurkeztea; «izan ere, bigarren indarra baita». Honekin PSE-EEk «bere konpromisoak betetzen» dituela aipatu zuen.

Arriolaren ustez, mozio etikoak eztabaidatu ondoren «hurrengo pausua emateko garaia iritsi da», eta zentsura mozioak aurkeztea «jarraipen logikoa da». Hori dela eta, ordezkari sozialistek gainontzeko alderdi politikoei zentsura mozioak aurkeztuko dizkiete eta hamar eguneko epea eskaini diete «beren erabakia hausnartzeko denbora nahikoa eta arrazoizkoa» delakoan.

Gehiengo absolutua beharrezkoa

Zentsura mozioa aurkezteko eta aurrera ateratzeko Udalbatzako kideen gehiengo absolutua beharrezkoa da. Beraz, hau lortuz gero, udal erregistrora pasatuko dira mozioak, udalbatzarrean eztabaidatu ahal izateko. Arriolak, bestalde, EAJrengan «konfidantza osoa» du, jeltzaleek «konpromiso argia» erakutsi baitute mozio etiko-etan.

Zentsura mozioen aurkezpena «alkatetzarako hautagai alternatiboa» denak aurkeztu beharko duela adierazi du Arriolak. PSE-EEren aldetik, «hautagaiak» hauek izango dira: Pasaian Izaskun Gomez, Hernanin Jose Ramon Chica eta Arrasaten Paco Garcia Raya.

«Esker hitzak»

Pasaiako PSE-EEk helarazitako komunikatuan Bixen Itxasok «sufritu zituen erasoak eta udalbatzarrean zinegotziek jasan genituen irain eta mehatxuak» aipatzen ditu. Adierazpen hauek «gure konpromisoekin jarraitzeko estimulu» direla adierazi du. Komunikatu berean azaldu dutenez, «Pasaiako sozialistok ez genuen mozioa aurkeztu etika ikasgairik inori emateko, helburua gure adiskidearen oroimena ohoratzea izan da, besterik gabe».