Oarsoaldeko Hitza

Tomas Garbizu Musika Eskolako ikasleek atzo ekin zieten ikasturte bukaerako emanaldiei. Kontzertu pedagogikoek eman zioten hasiera; Herri Eskolako ikasleak izan zituzten entzule

Urduri hasi zuten emanaldia Tomas Garbizu Musika Eskolako ikasleek, baina denborak aurrera egin ahala, eroso sentitu ziren Gezala Auditoriumeko oholtzan, eta saio ederra eskaini zuten.

Erosotasun hori lortzeko ikusleek izan zuten erru apur bat. Lezo Herri Eskolako ikasleak izan zituzten butaketan adi-adi entzuten. Xanti Espina, Tomas Garbizu Musika Eskolako zuzendaria aurkezle lanetan aritu zen, eta honek haurren parte-hartzea bultzatu zuen behin eta berriz, eta erantzuna ona izan zen. Herri Eskolako haurrek gogoz kantatu zituzten musika ikasleek jotako doinuak.

Kontzertu pedagogikoa zen atzokoa, horregatik zen horren garrantzitsua ikusleen parte-hartzea. Musikarekin irakatsi ere egin daitekeela erakutsi zuten atzo.

Hiru emanaldi

Tronpeta; oboea; txistua; saxofoia; trikitixa; panderoa; kitarra; tuba; tronboia; biolontxeloa eta kantu ikasleek hartu zuten parte atzoko emanaldietan. Hiru izan ziren. Lehena, 11:00etan, bigarrena, 11:45ean, eta azkena, 18:00etan.

18:00etako emanaldian oboe, biolentxeloa eta orkestra entzuteko aukera izan zuten ikusleek. Irma Aseginolaza, Iñaki Alberro eta Estanis Karreraren ikasleek eskaini zuten emanaldia. Karreraren zuzendaritzapean, besteak beste, Beatles taldean Let it be edo Bizeten Carmen jo zituzten.

Haurrak, kontzertua eskaintzeko irrikitan

Urtean zehar ikasitakoa taularatu zuten ikasleek. «Horrenbeste entseatu ondoren, jendaurrean ikasitakoa erakusteko irrikitan egoten dira haurrak», azaldu zuten Musika Eskolako arduradunek.

Ikasturte bukaerako kontzertuek asteartera arteko etena izango dute orain. Klarinetea eta tronboia jotzen duten ikasleen txanda izango da orduan, 18:00etan, Musika Eskolan.