Oarsoaldeko Hitza

651 sinadura bildu ditu herriko Euskal Herrian Euskaraz-ek (EHE) «Carrefourren eta Alcampon euskaraz erosi nahi» dutela aldarrikatuz.

Atzo, bi hilabetez sinadurak biltzen aritu ondoren, jasotako sinadura horiek guztiak eta talde euskaltzaleak merkaltaguneei egiten dizkien eskariak entregatu zituzten.

«Euskal hiztunen eskubideak errespetatzeko» eskatu diote bi merkatal guneei herritarrek.

Herritarren «konpromisoa»

Herritarrek erakutsi duten «konpromisoarekin» pozik dago talde euskaltzalea.

«Normalean, EHE izaten da horrelako gauzak salatzen dituena, baina herritarren inplikazioa lortu nahi genuen», diote kideek. Eta lortu dutelakoan daude.

Oiartzun eta ingurukoak

Sinatzaile gehienak Oiartzungoak edo inguruko herrietakoak izan dira. «Bi merkatal gune handietako bezero diren guztiak sinatu ahal izan dute».

Baina urrunagoko sinatzaileak ere izan dira, hala ere: Laudio, Lekeitio, Ondarroa, Bilbo, Plentzia, Azpeitia, Gasteiz, Amaiur, Durango, Iruñea, Azkoitia, Elizondo, Ataun, Bergara edo Olazti...

Internet bidez

Sinadura bilketa kalean eta Internet bidez egin dute. www.blogari.net/ehe helbidean sinadura asko jaso dituzte. Lehen aldiz erabili dute Internet horrelako zerbaitetarako EHEko kideek.

Presoen aldeko barrikotean eta Sagardo Egunean ere sinadura «mordoska» bildu zituztela adierazi dute EHEko kideek.

Zuzendariei gutuna

Euskaltzaleek herriko bi merkatal guneetako zuzendariei eman zizkieten sinadurak, gutun batekin batera.

«Aurretik ere gutun hau bidali diegu, baina ez dugu erantzunik jaso», zehaztu dute Euskal Herrian Euskarazeko kideek.

Egindako lanarekin bi merkatal guneek euskararekin eta euskal hiztunekin duten jarrera «aldatzeko» eskatu nahi dute.