Oarsoaldeko Hitza

I. Hip Hop Eguna egin zuten atzo Lezon. Egun guztian zehar, hainbat ekitaldi izan ziren: grafiti tailerrak, break dance ikastaroak, rap eta reggae musika saioak... Dozenaka gaztek parte hartu zuten.

Lezoko Goiko Plazan hip hop erritmoak nagusitu ziren atzo. I. Hip Hop Eguna arrakastatsua izan zen, eta dozenaka parte-hartzaile izan zituen.

Goizeko 11:00ak aldera grafitiak marrazten hasi ziren hainbat gazte, eta ordubetez aritu ziren festarako propio prestaturiko panelak margotzen. Kolorez bete zuten festa, eta maila handiko marrazkiak ikus ahal izan ziren.

12:30ean, berriz, break dance tailerrak hasi ziren. Daddy Jeff DJaren musikarekin eta Aritz Sound Systemen gidaritzapean, herriko hainbat gazte saiatu ziren oinarrizko urratsak eta mugimenduak ikasten. 14:00etan, berriz, bazkaltzeko atsedenaldia hartu zuten parte-hartzaileek.

Arratsaldean, musika eta dantza nagusi

Rap eta reggae musika saioekin hasi ziren arratsaldeko ekitaldiak. Euskal Herriko hainbat txokotatik etorritako abeslariak izan ziren oholtzaren gainean. Hip hoparen erritmoan, askotariko gaiak landu zituzten inprobisazioz beteriko kantuetan. Eguna bukatzeko, Aritz Sound Systemek gidatutako break dantzarien erakustaldia ikus ahal izan zen.

I. Hip Hoparen Egunak, beraz, jendearen erantzun ona izan zuen, eta antolatzaileak gustura azaldu ziren: «Hip hop mugimendua bere osotasunean erakusteko aukera izan dugu, eta oso pozik gaude emaitzarekin».