Oarsoaldeko Hitza

Gizartea Elkarteen Koordinakundeak «arrakastatsutzat» jo du martxa, eta lanean jarraituko duela iragarri

alain maya

Birgaitze eredu berri baten alde indarrak metatu zituzten hainbat pasaitarrek Elkarteen Koordinakundeak eskatu bezala. Ehunka lagunek hartu zuten parte badiari bira eman zion martxan, eta festa giroan izan zuen bukaera sardin jatearekin, musikarekin eta sagardoarekin.

San Pedroko Torretik abiatu zen martxa 11:00etan Pasaia bada garaia lelopean; martxara bildutakoek lelo bera zeraman elastiko laranjak soinean zituzten. 150 lagun inguruk ekin zioten martxari, baina uholde laranja handitzen joan zen barrutietatik igaro ahala.

Udaleko ordezkariak

Lau trikitilari gaztek zabaltzen zuten martxa, non Pasaiako Udaleko zenbait ordezkariak zeuden. Maider Ziganda alkatea, Ander Poza edo Xabier Pombo, besteak beste.

Trintxerpeko Gernika Plazan lehen etenaldia egin ostean, Gomistegiruntz jo zuten, eta Eskalerillasetik Antxorako bidea hartu zuten. Kopurua asko handitu zen bukaerarako. Antxoko Gure Zumardian, adibidez, jendetza handia bildu zen. Handik, Donibanerako bidea hartu zuen martxak.

Martxa 14:00ak inguru amaitu zen Pasai Donibaneko Santiago plazan. Bertan, festa giroa izan zen nagusi. Sardin jatea, edari eta musika izan ziren. Elkarteen Koordinakundeko kideak pozik ziren bukaeran martxak izan zuen erantzunarekin.