Oarsoaldeko Hitza

Lezoko kirolariek emaitza oso onak lortu zituzten asteburun Cartagenan (Murtzia) egin zen Espainiako Olinpiar Borroka Txapelketan. Herritik hiru kirolari joan ziren Murtzia aldera lehiatzera, eta hiruek lan oso txukuna egin zuten. Jasotako domina uzta horren lekuko: Garikoitz Sagarzazuk urrezko domina irabazi zuen 66 kilo arteko mailan; 57 kilo artekoan, baina nesketan, Ane Cazorlak zilarrezkoa ekarri zuen Lezora. Azkenik, Beñat Gainza bosgarren izan zen 59 kilo arteko kategorian.

Allerru Judo Taldeko kideak dira hiruak. Eta bertatik jakitera eman dutenez, olinpiar borroka ez dute normalean egiten, izan ere, judoan jartzen dutelako indar gehien. Horregatik, meritu bikoitza dute Cartagena aldean lortutako emaitzek.

Sagarzazu handia

Gari Sagarzazu lezoarra Espainiako judo txapeldun, eta olinpiar borroka txapeldun izan da aurten. Asteburuko olinpiar borroka lehian (66 kiloko kategorian aritu zen borrokan), erraz asko irabazi zituen egin zituen borrokaldi guztiak, finala barne. Indar handia du Sagarzazuk, eta teknika zorrotza. Hartara, borrokaldi guztiak azkar irabazi zituen lezoarrak.

Ane Cazorlak ere finalerako bidea erraz asko egin zuen, 57 kiloko mailan. Finalean, berriz, Andaluziako ordezkaria izan zuen kontrario: finala bukatzeko bi segundo falta zirela azken erasoa egin zuen Cazorlak, garaipenaren bila joateko, baina kontrarioak ondo eutsi zion erasoaldiari, eta azkenean, zilarrezko dominarekin konformatu behar.

59 kiloko mailan, azkenik, Gimenez donostiarrak utzi zuen dominetako borrokatik kanpo Beñat Gainza.