Oarsoaldeko Hitza

Gustura bukatu du Donibane-Majestik-ek denboraldia, Bigarren Nazionalera igotzea lortu ez duen arren.

Loyola Indautxuren aurka jokatu zuten denboraldiko azken partida irabaztea lortu zuen, 31-28 emaitzarekin. «Gozatzera irten ginen, ez genuen presiorik, baina tentsio puntu batekin, ohikoak diren lesioak ekiditeko», aipatu du Jesus Pinok, taldeko entrenatzaileak.

Taldeak ez zuen ezer jokoan eta presiorik ez zutenez partidan aurrea hartzen hasi ziren: «Erasoan huts gutxi egin genituen, eta defentsa etengabe aurreratzen zen aurkako taldeen erasoak aurreikusiz. Gainera, Albertok bere atea menderaezin mantendu zuen eta honek zortzi goleko aldea eman zigun partida hasieran», adierazi du Pinok.

Partidak aurrera, baina, bi goleko aldea baino gehiago ez zuten izan: «Partida ezin berdintsuagoa izan zen; beti aurretik izan ginen, hori bai. Aurkako taldeak aldea txikitzen zuenean, guk, gol aldea handiagotzeko saiakerak egiten genituen. Horrez gain, aipatu behar da Xabi Babacek jokatutako partida. Bederatzi gol sartu zituen eta forma oso onean dagoen jokalaria dela erakutsi du».

Partida honekin Majestik-ek denboraldia bukatutzat eman du eta mailaz igo ez diren arren, pozik daude taldekoak, igoeratik puntu bakarrera geratu direlako, «hasierako helburuak» beteaz.

Taldeko afaria

Denboraldia bukatuta, Donibane- Majestik-ek taldeko afaria egingo du etzi Errenteria-Oreretako Eguzki jatetxean.