Oarsoaldeko Hitza

Igandean, hilaren 15ean, Bilboko Arriaga Antzokia Euskal Herriko Kantu Txapelketako finalaren oholtza izango da. Parte-hartzaileen artean, Irati Odriozola (Oiartzun, 1991) eta Olatz Mitxelena (Oiartzun, 1989) daude, Gipuzkoako Kantu Txapelketan jasotako puntuei esker.

Lehen aldiz parte hartuko duzue Euskal Herriko Txapelketan. Zer sentitzen duzue?

Irati Odriozola: Lau urtez behin izaten da, eta gu duela bi urte hasi ginen Gipuzkoakoan parte hartzen. Oso urruti ikusten dut eguna, eta igandean da! Ondo ateratzea nahi dut, jendea gustura gelditzea. Gipuzkoan ere maila badagoela erakutsi nahi nuke.

Olatz Mitxelena: Beldur pixka bat ematen dit. Gipuzkoan ongi ibili ginen, eta orain, agian, maila bera espero da. Ilusioa bai, baina beldurra ere bai.

Gipuzkoako Txapelketako talde bera izango al duzue?

Mitxelena: Antton Valverderen Amaiur gaztelu baltza abestuko dugu Ane Badiolak eta biok, Gipuzkoan bezala. Maialen Irastorza, Izar Azpiroz, Garazi Ansa eta Joxe Leon Kazabon izango ditugu laguntzaile.

Odriozola: Nik Xabier Leteren Heriotzaren begiak. Gipuzkoako Txapelketan Jagoba Astiazaranek lagundu ninduen pianoan. Zerbait berezia egin nahi dugu, baina ostiralean erabakiko dugu. Agian biolontxeloa eta biola sartuko ditugu.

Helbururik baduzue?

Mitxelena: Ongi ateratzea eta ongi pasatzea da helburua. Guretzako gauza handia da Euskal Herriko finalera iristea. Aukera aprobetxatzea nahikoa da.

Odriozola: Ilusioa egiten du Euskal Herriko txapela eduki dezakezula pentsatzeak, baina oso urruti ikusten dut. Ongi pasatzea da helburua. Orain arteko txapelduna lehengusina dut, eta badugu lehia puntu hori, ea txapela kenduko diodan, kar-kar. Zerbait lortzen badut, ongi, eta bestela, baita ere.

Nola ari zarete prestatzen zita garrantzitsua?

Mitxelena: Bakoitza bere aldetik asko egitekotan gelditu ginen eta gaur -atzo- elkartuko gara lehen aldiz!

Odriozola: Ez dugu denborarik biltzeko ere... Ostiral goizean ordu erditxo bat entseatuko dugu, eta ateratzen den bezala joango gara Bilbora.