Oarsoaldeko Hitza

Alemaniako Schorndorf herriko gazteei harrera egin zien atzo Errenteriako Udalak. Orain dela urte batzuk martxan jarritako elkartrukerako programaren baitan etorri dira gazte alemaniarrak. Guztira, 34. «Lehenengo aldian 16 etorri ziren, eta oraingo honetan askoz gehiago dira. Horrek esan nahi du Errenteria eta Euskal Herria gustuko dutela, eta hemen ematen diegun tratuarekin pozik daudela», azaldu zuen atzoko harrera ekitaldian Juan Carlos Merino alkateak.



Koldo Mitxelena

ikastetxekoen harrera

Alemaniako Schorndorf herriko gazteak Koldo Mitxelenako ikasleen etxeetan izan dira egunotan, eta oso pozik daude jasotako tratuarekin: «Jendeak egin digun harrera oso ona izan da. Koldo Mitxelenako ikasleei eta gurasoei eskerrak eman nahi dizkiegu, Euskal Herria eta bertako jendea hobeto ezagutzen lagundu digutelako», azaldu zuen Birgit Kammer Schorndorfeko gazteen irakasle eta arduradunak.

Alemaniako 34 gazteak Iruñean, Bilbon eta Gernikan izan dira egunotan, Koldo Mitxelena ikastetxeko gurasoek eta ikasleek lagunduta. «Oso esperientzia polita izan da. Jendea oso jatorra da hemen, eta ez dut inoiz ahaztuko jaso dudan tratua», azaldu zuen atzoko harrera ekitaldiaren amaieran Schorndorfetik etorritako neska gazte batek.



Datorren urtean berriro

Elkartrukerako programa izaten ari den arrakasta ikusita, datorren urtean esperientzia errepikatzeko gogoz azaldu ziren antolatzaileak: «Europako gazteen arteko harremanak estutzea eta sendotzea oso ona da, eta horregatik gisa honetako ekimenekin jarraitu beharra dago», azpimarratu zuen Juan Carlos Merinok.