Oarsoaldeko Hitza

San Pedroko Ondartxo Abesbatzak 25. urteurrena du aurten, zilarrezko ezteiak, eta horren harira jai handia dute prestatua biharko. 25 urte hauetan Ondartxo Abesbatzatik pasatu diren kantariak elkartuko dira: «Biharko eguna pasadizoak elkartrukatzeko eguna izango da, elkar ezagutzekoa eta nola ez, kantatzekoa», azaldu dute Ondartxo Abesbatzatik.

Lehenengo hitzordua San Pedroko parrokian egingo dute, 12:00etan. Bertan Abesbatzan aritu ziren kantarien omenezko elizkizuna egingo dute, «jada gure artean ez dauden lagun handiei zuzendua». Kontzertuak ere parrokian bertan izango dira.

Bi kontzertu

Ondartxo Abesbatzak bi kontzertu emango ditu: bata, beraiek bakarrik eta bestea, Pasaia Abesbatzarekin batera: «Lehenengo gure jarraitzaileei kontzertua eskainiko diegu, eta ondoren, modu pribatuagoan edo, bazkaldu eta gero gure artean abestuko dugu. Ondoren, bai, Pasaia Abesbatzarekin kontzertu bat emango dugu».

Ondartxok Pasaia Abesbatzari bere kolaborazioa eskertu nahi izan dio 25. urteurrenean parte hartzeagatik: «Ohore handia da tamaina honetako abesbatzarekin kantatzea. Zumarragako lehiaketan parte hartu zuen eta emanaldi paregabea eskaini zuten. Bestalde, lan handia egiten dute gazteekin eta heldu nahiz gazteak elkarrekin aritzea lortu dute».

Atzera begira

Koroa osatuta zegoenean, 1986an Musika Abesbatza Astea antolatu zuten. Ordutik, urtero-urtero antolatu dute aste hau eta aurten 23. edizioa ospatuko da. Urte hauetan guztietan Euskal Herriko nahiz Europako abesbatzek abestu dute Musika Abesbatza Astean. Hala nola, Poloniako eta Alemaniako koruak. Kantari sonatuak ere San Pedron izanak dira, Maria Jose Arrizabalaga mezzo sopranoa, esate baterako.

Urtebete geroago, 1987an, lehenengo Jaizkibelgo Haurren Koruen Topaketak antolatu zituen Ondartxo Abesbatzak: «300 haur baino gehiagok gure kaleak hartu zituzten. Oso oroitzapen politak geratu zaizkigu», azaldu dute Ondartxotik. Horrez guztiaz gain, beste hamaika ekimen ere atera dituzte aurrera Ondartxo Abesbatzakoek eta guztiaren balorazio «positiboa» egin dute. Honekin batera, «San Pedro herriari 25 urte hauetan bere baldintzarik gabeko babesa eskertu nahi diegu».