Oarsoaldeko Hitza

Pasaiako tabernek moko finenentzako moduko pintxoak prestatu dituzte asteburuan, Antxoko eta Trintxerpeko 15 tabernek VIII. Pintxo Lehiaketan parte hartu dutelako

Hiru hizketagai nagusi izan zituzten atzo Antxon eta Trintxerpen. Reala, Leitzako pilotariak, eta pintxoak. Reala, gaur, Lehen Mailara igotzeko partida erabakigarria duelako; Leitzako pilotariak, gaur ere, Banakako Pilota Txapelketako finala Oinatz Bengoetxea eta Abel Barriola leitzarrek jokatuko dutelako; eta pintxoak, Antxon eta Trintxerpen VIII. Pintxo Lehiaketa egin zelako.

Hala, hiru gaiak bat egin zituenik izan zen. Izan ere, atzo eguerdian bor-bor zeudelako Laurak Bat-ek antolatutako Pintxo Lehiaketan parte hartu zuten 15 tabernak; zortzi Trintxerpekoak, eta zazpi, Antxokoak. «Aizu! Eta pintxo hau Eibarreko jokalariei bidaltzen badiegu, Sportingi irabazteko», edo «Leitzan mota honetako pintxoak jaten al dituzte, pilotan hain ondo ibiltzeko?» bezalako esaldiak entzun ziren, Pasaiako tabernetan, atzo eguerdian. Pintxoak oso ondo zeuden seinale izan ziren esaldi horiek.

Jan, eta puntuak eman

Pintxo Lehiaketaren zortzigarren urtea izanik, pintxoetan adituak dira dagoeneko pasaitarrak. Izan ere, txapelketaren baitan publikoak emango duen saria baitago. Tentuz dastatzen dituzte pintxoak, herritarrek. Zizka-mizka eztarritik behera ardo goxoaren laguntzarekin bultzatu ondoren, boligrafoa hartu, hiru segunduz begiak sapaira begira jarri (pentsatzen-edo), eta puntuak jarri zizkieten pintxoei. Gaur jakingo da publikoaren ustez eta sukaldari adituen ustez zeintzuk diren Pasaiako pintxorik goxoenak.