Oarsoaldeko Hitza

Errenteria-Oreretako eta inguruko herrietako galiziarrak XIX. Galiziako Astean parte hartzera gonbidatu zituen atzo Joxe Mari Burgos Kultura zinegotziak. Datorren asteartetik aurrera ospatuko dute eta egitarauaren aurkezpena egin zuten atzo Errenteriako Udalean. «Galiziarrak ez direnak ere gonbidatuta daude», gaineratu zuen zinegotziak.

Egitarau zabala prestatu dute, eta Xose Antonio Vilaboa Euskadiko Galiziar Etxeetako idazkari nagusiak eman zuen denaren berri. Aurten zimena galiziarra ikusteko aukera izango da Reina aretoan, asteartean eta asteazkenean. Ostegunean, Xose Estevezek hitzaldia eskainiko du eta larunbatean jai handia egingo dute.

'Estadea' aldizkaria

Galiziako Asteko lehenengo eguneko zine emanaldira joaten direnek urtero argitaratzen duten Estadea aldizkaria eskuratu ahal izango dute. Bertan egingo du aldizkariaren aurkezpena Xose Antonio Vilaboa egileak. Urtero bezala literatur aldizkaria herrian aurkeztuko dute, «beti aurkeztu dut hemen, Galiziako Etxe guztietan banatzen bada ere», esan zuen Vilaboak. Herritarrek idatzitako testuak eta Galiziari buruzko hainbat lan ere dauzka aldizkariak.

Vilaboak horietako lan bat nabarmendu zuen atzo: «Escoitando o Vento izenburuko diskoa grabatzen ari gara eta iraila hasierarako kalean egotea espero dugu». Aldizkariak diskoaren berri ematen du erreportaje batean. Galiziako gaita eta txistua nahastu dituzte eta bi herrietako pieza ezagunak entzun ahal izango dira.