Oarsoaldeko Hitza

Oskar Malles Zubeldia Altzate igerilekuko langileak sari bikoitza jaso du Serviociok antolatutako argazki lehiaketan.

Batetik, Lezo mailan antolatutako lehiaketa irabazi du. Hilabeteko bonoa eta 30 euro kirol materialetan gastatzeko. 20 lan aurkeztu dituzte Lezon. Onena, Mallesen El patito argazkia izan da.

Espainiako Estatuko onena

Argazki lehiaketan kirol instalakuntzak edota hauetan egiten diren jarduerak islatu behar ziren.

Espainiako Estatuan Serviociok dituen 30 instalakuntzen arteko lehiaketa ere Mallesek irabazi du. Sari potoloa jasoko du: urtebeteko bonoa doan eta 600 euroko saria.

«Ez nuen espero irabaztea»

Oskar Malles pozik dago sariekin. «Ez nuen espero irabaziko nuenik», kontatu du. Lankideek animatuta aurkeztu zen. Lehen aldiz aurkeztu ditu lanak, nahiz eta lehiaketa egiten hasi zirela dagoeneko hiru urte pasa diren.

Hiru lan aurkeztu zituen lehiaketara. «Argazkilaritza gustokoa dut», aitortu du.

Datorren urtean berriz aurkeztuko dela esan du. «Jendea animatu nahi dut parte hartzera».

Erakusketa Altzaten

Urko Munduate Altzate igerilekuko kudeatzaileak eman zion saria Mallesi.

Lezoko lehiaketan aurkeztu dituzten lanekin erakusketa txiki bat antolatu dute. «Urtez urte maila handitzen ari da eta aurkezten diren lan kopurua ere bai», dio Munduatek.