Oarsoaldeko Hitza

Oiartzun Kirol Elkarteak (OKE), Udalaren laguntzarekin, Ugaldetxoko belar artifizialeko futbol zelai berria inauguratuko du datorren igandean, hilaren 22an. Zelai berri, amets berri leloa erabiltzen ari dira eguna izendatzeko.

Futbol zelaia inauguratzeaz gain, taldea osatzen duten kirolari eta senide guztien jaia izateko ere baliatuko dute eguna.

Gainera, talde bakoitzeko jokalari nabarmenenei ere oroigarriak banatuko dizkiete.

Bazkari herrikoia

Bazkari herrikoia futbol zelaiko aparkalekuan egingo dute, karpak jarrita.

Txartelak dagoeneko eskuragarri daude ohiko tokietan eta Elkartean bertan. 11 urte arteko haurrek 10 euro ordaindu behar dituzte eta besteek, 20.

Laguntzaile bila

Honez gain, Oiartzun Kirol Elkartea laguntzaile bila ere ari da. Norbanako edota enpresei 50 eurotik hasita, borondatezko diru-eskaintzak egiteko deia luzatu diete.

Trukean, eskertza moduan, oparitxo bat jasoko dute dirua jartzen duten guztiek.

Dirua Kutxako 2101 0060 0900 1211 8428 kontu korrontean sartu behar da.

Futbol zelai berria denboraldi honetan hasi dira erabiltzen, lehen harri txintxarrezko zelaia baitzen.

Prestakuntzak hasi dira

Dagoeneko hasi dira eguna ospatu ahal izateko azpiegituren prestakuntzak egiten.

Horregatik, gaurtik hilaren 24ra arte, ezin izango da aparkatu futbol zelaiko aparkalekuan, han ari baitira oholtza eta karpa jartzen.