Oarsoaldeko Hitza

Herriko trafikoaren egoera «penagarria» salatu zuten atzo Agus Cano, Karlos Murua eta Itsasne Alvarez ezker abertzaleko zinegotziek. «Auto ilada luzeak, aparkatzeko arazoak, kutsadura eta arriskua ohikoak dira herrian, eta horren aurrean Udalak ez du ezer egiten», azpimarratu zuen Agus Canok.

Orain dela bi aste Fanderian izandako zoritxarreko auto istripua (Alaitz Zudaire gaztea hil zenekoa) egoera «penagarri» horren barruan kokatzen dute hiru zinegotzi independentistek. «Bizilagunek adierazitako haserrea ulertzen dugu, Udala aldez aurretik abisatuta zegoelako. Aurreko urteetan istripurik ez da izan, baina arriskua hor zegoen. Azkenean, zoritxarrez, bizilagunek salatutakoa gertatu da», adierazi zuen Canok.

Konponbiderako neurriak

Herriko trafikoaren egoera hobetzeko hainbat neurri proposatu zituzten atzoko agerraldian ezker abertzaleko hiru zinegotziek: barne trafikoa berregituratzea eta arrazionalizatzea; norantza eta norabideak ikertzea; zebrabideetako erregulazio falta konpontzea; zebrabideetan eta bidegurutzeetan ikuspen maila nahikoa dela bermatzea; herri barruan dabilen ibilgailu kopurua murrizteko neurriak hartzea eta garraio publikoaren erabilera bultzatzea eta indartzea.



Dimisio eskaera

Legegintzaldia hasi denetik, aipaturiko neurriak hartu ez direnez, Mari Mar Carrillo Trafiko Saileko arduradunaren dimisioa eskatu zuten atzo ezker abertzaleko zinegotziek.

«Gauzak askoz hobeto egin daitezkeela uste dugu, eta, horregatik eskatzen dugu dimisioa, egoera hobetzeko», azaldu zuen Karlos Muruak.