Oarsoaldeko Hitza

Ekainaren 28an Gay eta Lesbianen Harrotasun Egunaren baitan Emakume eta gizon homosexualak historian zehar erakusketa jarri du Gehituk Xenpelar Etxean. Helburua, erakusketa «hezitzailea eta informatiboa» izatea dela azaldu zuten atzoko aurkezpen agerraldian.

«Normalizazio bidean gaude, baina oraindik zenbait aurreiritzi, estereotipo... daude. Erakusketa honekin gizakia hala denetik homosexualitatea existitzen dela agerian utzi nahi dugu», azaldu zuen Koldobike Mujika Gehituko koordinatzaileak atzoko agerraldian.

23 gizon eta emakume ospetsuren argazkiarekin eta informazioarekin osatu dute erakusketa. «Euren historiak ikasi ditugu, baina ez da jakin guztiek komunean zerbait dutela; homosexualak direla», azaldu zuen Mujikak. «Gazteentzako erreferenteak eman nahi ditugu. Maiz homosexualak direla konturatzen direnean bakarrik sentitzen dira, eta honek lagun diezaieke. Gure helburua erakusketa hezitzailea eta informatiboa izatea da», gaineratu du.

Garai ezberdinak

Garai guztietako homosexualak ikus daitezke erakusketan. Kristo aurreko garaietatik, Safo, Sokrates edo Alejandro Magnotik hasita, gaur egunera arte, Martina Navratilova, Jesus Vazquez edo Alejandro Amenabarreraino, besteak beste. «Garai guztiak hartzen saiatu garai, baina Erdi Aroan hutsunea dago. Garai iluna izan zen hura, eta homosexualitatearentzako beltza guztiz», azaldu dute.

Bestalde, lesbianak bilatzerako orduan izandako zailtasunak azaldu zituzten. «Emakumeak gizarte honetan bigarren maila batean bizi izan diren isla da. Horregatik hilaren 28ko manifestazioaren leloa Lesbianak ikusgai eta askotarikoak izango da. Lesbianak direna azaltzeko beldurrik izan ez dezatela aldarrikatu nahi dugu», azaldu zuten Gehituko kideek.

Burgos, marginazio sexualaren aurka

Joxe Mari Burgos Errenteriako Udaleko kultura zinegotziak eskerrak eman zizkien Gehituko kideei erakusketa herrian jartzeagatik. «Errenteria beti egon da marginazio sexualaren aurka, eta pozik hartu dugu erakusketa hau», azaldu zuen Burgosek.

Bestalde, Nazioarteko Gay eta Lesbianen Harrotasun Egunaren gogora ekarri zuen Burgosek, eta egun hau horrenbeste borroka egin dutenen oroimenezko festa izatea eskatu zuen. Horrez gain, aldarrikapenerako eguna izan behar dela esan zuen.