Oarsoaldeko Hitza

Murixka Dantza Taldea Menorcako (Herrialde Katalanak) Ciutadella herrian egingo den dantza jaialdian parte hartuko du. Zehatz mehatz, uztailaren 4tik 6ra izango da Citadellako dantza jaialdia, eta Murixkakoek uztailaren 5eko saioan parte hartuko dute.

Murixkako kide Itsaso Irastorzak esandakoen arabera, Ciutadellara joateko aukera duela 2-3 urte sortu zen; «Aritz Salamanca Murixkako dantzariaren bitartez jakin genuen bertako dantza jaialdian euskal dantza talde batek parte hartzea nahi zutela. Iaz, Murixkak 50. urteurrena bete zuen, eta ezinezkoa egin zitzaigun hara joatea. Aurten, ordea, aukera hori ez dugu galdu».

Uztailaren 5eko dantzaldiaz gain, uztailaren 3an, Ciutadella herriaren inguruko beste herri batean emanaldia emango dute ere bai Murixkakoek. Denera, 20 bat dantzari joango dira Lezotik Menorca aldera, eta prestatu dituzten dantzak Gipuzkoako dantzak dira batik bat.

Irailean, bueltakoa

Uztailaren hasieran, Menorcako Ciutadellara joango dira Murixka Dantza Taldekoak. Baina irailean etorriko da bueltakoa. Itsaso Irastorzak jakitera eman duenez, «guk Menorca ezagutzeko gogo handia dugu; baina aldi berean Menorcako lagunak Lezo eta Euskal Herria ezagutzera ekarri nahi ditugu trukean». Horregatik, irailaren 26, 27 eta 28an Menorcako dantzariak izango dira Lezon, Murixkakoekin batera. Elkarrekin dantza egingo dute.