Oarsoaldeko Hitza

2007-2008 ikasturtea bukatu berri da eta Udal Eskola Kontseiluak ez du bilera bakar bat egin. Halaxe salatu zuten atzo ezker abertzaleko Xanti Angulo eta Itsasne Alvarez zinegotziek. «Hezkuntza Batzordearen hainbat bileretan gai hau mahai gainera ekarri dugu, baina ez dute ezer ere egin», salatu zuen Xanti Angulok.

Aurtengo bilera gabezia, ordea, ez da berria izan. Udal Eskola Kontseiluak bost urte daramatza bilerarik egin gabe. Anguloren esanetan, «herriko eskola komunitate guztiek Udalaren hezkuntza politikan parte hartzeko helburua finkatzen dute Eskola Kontseiluaren estatutuek. Beraz, uneotan Udal Gobernu taldea herritarren partehartzea ukatzen ari dela esan daiteke».

Bost urte bilerarik gabe

Udal Eskola Kontseilua azken bost urteetan bildu ez den arren, denbora honetan guztian Udalak Kontseiluari diru kopuru bat esleitu diola salatu dute ezker abertzaleko zinegotziek. «Azken bost urte hauetan 203.375 euro gastatu dituzte. Kontseiluaren estatutuetan argi esaten da Udalak emandako dirua berak kudeatuko duela, baina Kontseilua ez bada bildu, eta, ondorioz, aurrekontuak eta gastuak ez baditu ontzat eman, norbait ari da ezkutuan Kontseiluaren funtzioak betetzen».

Halaber, Kontseiluaren azken urteko gastuak aztertu dituzte ezker abertzaleko zinegotziek, eta Kontseiluaren eginkizunekin bat ez datozen gastuak daudela ondorioztatu dute: «Esate baterako, Belabaratz aterpetxearen garbiketa gastuak Kontseiluaren diruaz ordaindu dira, nahiz eta ikastetxe bakar batek behin soilik erabili. Hainbat ikastetxeetako mantentze lanak ordaintzeko edo Gazteria Sailak antolatutako Bideo Lehiaketa ordaintzeko ere Kontseiluaren dirua erabili dute».

Bilera egiteko eskaera

Azken bost urteetako funtzionamendua alde batera utzi eta datorren ikasturterako Udal Eskola Kontseiluaren bilera eskatu dute ezker abertzaleko zinegotziek, «Kontseilua herritarren parte-hartzerako tresna bat delako».