Oarsoaldeko Hitza

20:30ak ziren atzo sanpedroen hasiera iragarri zuen suziria Alkatordetzatik bota zutenerako, ordurako jai giroa nagusi zen arren barrutiko kaleetan. Jaien hasieran, aurten urteurrena ospatzen ari diren elkarteak izan ziren protagonista; Arraun Elkartea sorreraren 50. urteurrena ospatzen ari delako; Txoko Elkarteak, 75. urteurrena duelako, eta Ondartxo Abesbatzare sorreraren 25. urteurrena delako.

Omendutako hiru elkarteetako kideek, suziria botatzearekin konformatu ez, eta hasiera koloretsua eman zioten festari. Torrean bildu ziren omendutako guztiak, eta antzinako jantziak soinean, desfilean joan ziren plazaraino.

Aurten Libian arraun egingo duten arraunlariak aurkeztu zituzten lehenik Torrean, eta ondoren, gainontzeko omendutakoekin batera, garai bateko arraunlariak irten ziren desfilean, tartean, ondoko hauek: Ignacio Alzua; Jose Leon Arrieta; Luis Arrieta; Peio Arrieta; Jose Luis Arrillaga; Antonio Carrera; Luis Mari Goikoetxea; Jose Antonio Korta; Mikel Kortadi; Jose Ramon Martinez; Fermin Muguruza; Jose Juan Passicot; Luis Mari Sagasti; Imanol Etxeberria; Jose Erauskin, Nikasio Urkizu; Antxon Saldias eta Jose Ibarguren.

Txiki, gazte eta heldu

Txikienak aurretik hasi ziren festaz gozatzen, ordea, beraientzako antolatu baitzituzten arratsaldean jolasak, askaria eta buruhandiak.

Gazteak, aldiz, frontoian bildu ziren arratsaldean, Futbito Txapelketaren finala ikusteko.

Jada gauean, lehen eguneko huts egin ezinezko hitzordua izan zuten sanpedrotarrek danborradarekin. Pobladotik plazaraino, danbor hotsek girotu zuten festa. Arrantzale jantziak soinean, ozen abestu zuten San Pedroko martxa danborradan irten zirenek.