Oarsoaldeko Hitza

Telefonia mugikorreko antenen auzia konpontzeko lehen urratsa eman zuten atzo Errenteriako Udalbatza osatzen duten alderdiek. Hain zuzen ere, hurrengo zortzi hilabeteetan herrian telefonia mugikorreko antenarik ez jartzeko proposatzen zuen mozioa onartu zuten.

Koldo Mitxelena Ikastetxeko Gurasoen Elkarteak (AMPA) aurkeztu zuen mozioa Udalean, eta EAE-ANV eta Ezker Batua-Berdeak alderdien babesa izan zuen. Gainontzeko alderdiak, berriz, (PSE-EE, EAJ, EA eta PP) abstenitu egin ziren.

AMPAk aurkeztutako mozioak bi puntu zituen. Lehenengoan, «telefonia mugikorreko antenen instalakuntza zortzi hilabetez atzeratzeko» eskatu zuten. Bigarrenean, berriz, «telefonia mugikorreko antenei buruzko ordenantza bat egiteko» proposatu zioten Errenteriako Udalari.

Bigarren puntuari dagokionez, telefonia mugikorreko ordenantza bidean dela azpimarratu zuen Juan Carlos Merino alkateak. «Telefonia mugikorreko ordenantza berria oso aurreratua dago, eta Hirigintza Batzordean eztabaidatu ondoren, aurki aurkeztu ahal izango dugula uste dugu», azaldu zuen Merinok.

Gainontzeko erabakiak

Udalbatzaren atzoko bilkuran beste bi erabaki ere hartu zituzten. Batetik, 2007ko Ohiko Aurrekontuaren kontu orokorra onartzea, eta, bestetik, 4/08 zenbakiko kreditu aldaketari oniritzia ematea.

Bestalde, galdera eta eskarien atalean aurtengo madalenetan entzierrorik zergatik ez ote den izango galdetu zion alkateari EAE-ANV alderdiak. Juan Carlos Merinoren erantzuna honako hau izan zen: «Udaltzaingoak entzierroaren segurtasuna ezin izango duela bermatu jakinarazi zidan, eta horren aurrean entzierroa bertan behera uzteko erabakia hartu behar izan dut».