Oarsoaldeko Hitza

Herriko 28 elkartek dagoeneko martxan jarrita dituzte Euskara elkartera egitasmoaren baitan hartu dituzten konpromisoak.

Herenegun, elkarteetako ordezkariak «zoriondu» zituzten Udalak eta Ttur-Ttur Euskaltzaleon Bilguneko kideek -egitasmoa bultzatu eta kudeatzen duten erakundeek-.

Euskararen erabilera, %71koa

Aitziber Arnaiz Udaleko euskara teknikariak azaldu zuenez, Oiartzungo elkarteetako kideen %87a euskaraz ongi hitz egiteko gai da.

Euskararen presentziari dagokionez, %71koa da eta euskaraz egiten dena, %50a da.

«Honek ez du esan nahi elkarteen erdiak euskaraz funtzionatzen duenik», zehaztu zuen Arnaizek. «Gure helburua ezagutza eta erabileraren arteko tartea txikitzea da».

Hitzarmenak, neurrira eginak

Bakartxo Arabolaza suspertzaileak azaldu zuen «elkarte bakoitzak neurrira egindako konpromisoak» hartu dituela. «28 hitzarmenen artean, ez daude bi berdin», gaineratu zuen Arabolazak.

Udalak laguntza ekonomikoak ere bideratzen ditu euskalduntzen laguntzeko.

Bukaeran, Saioa Ballesteros Ttur-Tturreko lehendakariak elkarte bakoitzari txartel bana banatu zien, Lartaungo txistularien laguntzarekin eta Ander Lizarralderen bertso bat entzun ondoren.