Oarsoaldeko Hitza

ainara herrero ð- Realeko jokalaria

Ainara Herrero (1986, Lezo) futbolari handia izateko bidean da. 21 urterekin Realak fitxatu berri du, eta datorren denboraldiari itxaropentsu begiratzen dio.

Noiz eta nola hasi zinen futbolean?

Txikitatik asko gustatu izan zait. Hasieran, eskolan eta kalean jokatzen nuen eta, ondoren, Allerrun hasi nintzen. Hamar urterekin hasi eta bederatzi urte egin nituen bertan.

Hemeretzi urterekin Oiartzunen hasi zinen, ezta?

Allerrun nintzela Oiartzundik deitu ninduten eta ez nuen bitan pentsatu. Nazional Mailan jokatzea aurrerapauso bat izan zen, eta Oiartzunen pasatu ditudan bi urteak oso onak izan dira.

Espero al zenuen Realak fitxatzea?

Egia esan, ez nuen espero. Realeko entrenatzailea, Garbiñe, ezagutzen nuen eta Realarekin entrenamendu batzuk egiteko deitu ninduen. Entrenamenduak ondo atera zitzaizkidan, eta, azkenean, fitxatu egin naute.

Datorren denboraldiari begira zein helburu dituzu?

Superligan jokatzeak sekulako ilusioa egiten dit, baina badakit ez dela erraza izango. Lehenik eta behin, hamaikakoan postu bat lortzen saiatuko naiz eta, ondoren, ahalik eta jokorik onena egitea da nire helburua.

Zelai erdian jokatzen duzu, baina golak egiten ere badakizu. Realarekin gol bat sartzeak ilusio handia egingo lizuke, ezta?

Bai, noski. Ni ez naiz aurrelaria, baina azken denboraldian gol dezente sartu ditut, guztira, hemeretzi. Realarekin zaila izango da hainbeste sartzea, baina saiatu, saiatuko naiz.

Uztailaren bukaeran hasiko duzue aurredenboraldia Realean. Ordura arte atseden hartuko al duzu?

Ez, egia esan, Donosti Cup-en jokatzeko asmoa daukat. Oiartzungo eta Touringeko jokalari talde bat elkartu eta talde bat ateratzeko asmoa dugu. Ondo pasatzea da helburua. Hori bai, ez dut atseden hartzeko denborarik izango.