Oarsoaldeko Hitza

Herenegun bukatu zen Galiziako Astearen XIX. aldia, eta antolatzaileek balorazio positiboa egin dute. Xose Antonio Vilaboa Barreiro antolakuntzako kidearen esanetan, «aurtengo ekitaldiak jendetsuak eta interesgarriak izan dira».

Joan den asteartean abiatu zen Galiziako Astea. Egun horretan, Estadea aldizkariaren aurkezpena egin zuten. Ondorengo bi egunetan, berriz, Jorge Coira eta Xose Estevezen hitzaldiak izan ziren. «Eurokopako partidak direla -eta iaz baino jende gutxiago etorri zen hitzaldietara, baina ez dut uste kexatzeko moduan gaudenik. Xose Estevezek, esate baterako, makina bat lagun bildu zituen».

Zumardiko postua

Urtero legez, ostiraletik igandera, Galiziako gastronomiari eskainitako postua jarri zuten antolatzaileek Gamon Zumardian.

«Galiziako ohiko jakiak eta edariak dastatzeko aukera eman dugu, eta ehunka lagun pasatu dira bertatik. Larunbatekoa eta igandekoa, batez ere, oso egun jendetsuak izan ziren», azaldu du Xose Antonio Vilaboak.

Jakiez eta edariez gain, ordea, bestelako ekitaldiak ere antolatu zituzten postuaren inguruan: «Donostiako Galizia Etxeko gaita-joleak, dantzarien erromeria, Sestaoko Nosa Xente talde folklorikoa... Musika eta dantza uztartu genituen eta horrek giroa berotzeko balio izan zuen».

Datorren urtean berriro

Errenteria-Oreretako Galiziako Asteak 19 urte bete ditu , eta antolatzaileak pozik daude ekitaldiak hartu duen indarrarekin: «Udaleko ordezkariek laguntza handia ematen digute, eta herritarren babesa ere oso handia da. 2.000 galiziar inguru bizi dira herrian. Horregatik, aste hau antolatzen jarraitzea oso garrantzitsua da».