Oarsoaldeko Hitza

Gaur deklaratuko dute Espainiako Auzitegi Nazionaleko Fernando Grande-Marlaska epailearen aurrean atzo atxilotutako Errenteria-Oreretako eta Oiartzungo zortzi gazteek.

Agerraldia egin zuten Oiartzungo udaletxean atxilotu aurretik, «euskal gazteriaren kriminalizazio saiakerak» salatzeko eta euren egoera azaltzeko.

Oinatz Arbelaitz; Maitane Linazasoro; Alain Luna; Oihana Mujika; Imanol Sagarzazu; Hodeiertz Urain; Egoitz Urbe eta Iker Zabala dira atxilotuak.

Apirileko sarekadarekin lotura

Gazte horien kontra apirilaz geroztik bilatze eta atxilotze agindua emana zuen Espainiako Auzitegi Nazionalak.

Apirilaren 18an beste hamar gazte atxilotu zituzten sarekada polizial batean; atzo atxilotutakoen bila ere joan ziren euren etxeetara, baina ez zituzten topatu.

Ordutik, epailearen aurrean deklaratzen saiatu direla azaldu zuen gazteen abokatuak, Iker Sarriegik, baina epaileak ez diela «halakorik onartu» esan zuen.

«Ilegaltasunaren mugan dago epailearen jarrera», esan zuen abokatuak, «komisaldegian, torturatuak eta autoinkulpatuak ikusi nahi zituen gazte hauek».

Epailearen jarrerak gazteen «bermeak» kolokan jartzen zituela ere salatu zuen Sarriegik.

«Ez gara terroristak»

Gazteek argi dute zein den euren kontrako atxilotze aginduaren arrazoia: «Ez gara ez terroristak ezta gaizkileak ere. Gazte eta independentista izatea da gure delitu bakarra», zehaztu zuten.

Euren kontrako frogarik «ez dagoela» azpimarratu zuten gazteek eta abokatuek.

Agerraldian gazteek Gazte eta aske irabazi arte zioen kamisetak zeramatzaten jantzita.

«PSOEren estrategia da»

«Euskal gazteriak beti erakutsi du aurrera egiteko indarra eta aurrera egingo dugu», esan zuten gazteek.

Ziurtzat jo zuten atxilotuko zituztela. «Atxilotuko gaituzte, baina ez gaituzte kriminalizatuko».

«PSOEk diseinatutako estrategia errepresiboaren» barruan kokatu zuten euren kontrako atxilotze agindua, «lehenago beste toki batzuetako gazteei bezala, guri ere egokitu zaigu».

«Gure aukera berresten dugu»

Deia luzatuz bukatu zuten agerraldia gazteek: «Gure aukera politikoa berresten dugu eta gazteei antolatzeko eta borrokatzeko deia egiten diegu».

Eskualdeko gazteekin batera, Barakaldoko bi gazte ere, Jon Villanueva eta Asier Gomez, agerraldian izan ziren. Gero, Espainiako Poliziak Donostian atxilotu zituen horiek ere. Maiatzaz geroztik bilatze eta atxilotze agindua zuten euren kontra.