Oarsoaldeko Hitza

Oinatz Arbelaitz; Maitane Linazasoro; Alain Luna; Oihana Mujika; Hodeiertz Urain; Egoitz Urbe eta Iker Zabala gazteak baldintzarik gabe espetxeratu zituen atzo Espainiako Auzitegi Nazionaleko Fernando Grande-Marlaska epaileak.

Imanol Sagarzazu, berriz, 6.000 euroko bermearekin aske gelditu zen, karguekin.

Espetxeratutako gazteak Madrilgo Soto del Real kartzelan daude atzotik. Fiskalak eskatutako neurriak onartu zituen epaileak.

Herenegun atxilotu zituen Espainiako Poliziak Donostian, euren borondatez deklaratzera zihoazenean.

Hiru ordu inguruko deklarazio hartzea

Goizeko 10:00ak aldera hasi zen epailearen aurrean deklaratzen lehenengo atxilotua, Maitane Linazasoro oreretarra, konfiantzazko abokatuarekin Espainiako Auzitegi Nazionaleko 3. aretoan, Grande-Marlaska epailearen aurrean.

Azkarra izan zen deklarazio hartzea, 13:30ak alderako, zortzi gazteek deklaratu zuten epailearen aurrean.

Tratu egokia jaso dute

Gazteen abokatuek azaldu dutenez, atxiloturik egon diren bitartean tratu egokia jaso dute gazteek Espainiako Poliziaren eskutik eta komunikaturik egon dira.

Batzuentzat, Madrilerako bidaia gogorragoa izan zen. «Hiruri bidaia postura arraroetan eginarazi diete», kontatu zuten gazteen abokatuek.

«Segi eta kale borroka»

«Segiko kide izatea eta kale borroka ekintzetan parte hartzea» egozten die epaileak zortzi gazteei. Kartzelara eraman aurretik, espetxeratuek gurasoekin bost minutuz egoteko aukera izan zuten Auzitegi Nazionaleko kalabozoetan.

Askatasunak atzo bertan espetxeratzeak salatu zituen: «Justizia epaitegiz mozorrotu nahi duten gerra tribunala da Auzitegi Nazionala, gazte hauen atxiloketan argi ikusi denez». Gazteen askatasuna ere aldarrikatu du erakundeak.

Senideak eta lagunak, Madrilen

Atzo, berriz ere mobilizazio jendetsuak izan ziren gazteen herrietan, Errenteria-Oreretan eta Oiartzunen.

Autobusa beteta abiatu zen atzo lagun eta senideekin 06:00etan Madrilera, Errenteria-Oreretako eta Oiartzungo jendearekin.

Haiek izan ziren Sagarzazuri lehen harrera egin zietenak bermea ordainduta kalera atera zenean.

Goizaldean iristekoa zen Sagarzazu Errenteria-Oreretara lehenengo -jaioterrira- eta Oiartzunera gero -bizi den herrira-.