Oarsoaldeko Hitza

Patxi Hoyos herriko pilotoak 30 urtetik gora daramatza autoak gidatzen. Rallyetan parte hartzea da bere afiziorik handiena. Horregatik, ondo zaintzen du bere BMW M3 E30 autoa.

Eutsi gogor, bagoaz eta! Patxi Hoyosek gogor heldu dio bolanteari eta kopilotoaren beldur aurpegia ikusita animatzen hasi zaio. Izan ere, OARSOALDEKO HITZAn erredaktore izatea BMW M3 E30 autoan kopiloto lanetan joatea baino askoz errazagoa da!

Jaizkibel magaleko bidezidorretan batera eta bestera gabiltza. Azeleradorea topera zapaldu, martxak etengabe aldatu eta, tarteka, tronpo batzuk egiten ditu Hoyosek.

Kopilotoari tripak nahasten hasi zaizkio, baina Hoyosek lasai-lasai hitz egiten du hori guztia egiten duen bitartean: «30 urtetik gora daramatzat gidatzen eta ez dut inoiz afizioa galdu. Bolantearen aurrean jartzen naizenean gozatu egiten dut», azaldu du irribartsu herriko piloto famatuenak.

Autoak gustuko dituen igeltseroa

Patxi Hoyosek 53 urte ditu eta 21 urterekin hasi zen rallyetan parte hartzen. Hasiera-hasieratik, ordea, bere afiziorik handiena igeltsero lanarekin konpartitu behar izan du.

«Rallyetan parte hartzea oso garestia da, eta ondo ibili nahi baduzu autoetan dirua inbertitzea ezinbestekoa da. Horregatik, betidanik bestelako lanak egin behar izan ditut bizitza aurrera ateratzeko», azpimarratu du Hoyosek.

1976an, Seat 124 batekin hasi zen lasterketetan parte hartzen eta geroztik, ez du atsedenik hartu. Hasierako garai haiek emozio handiz gogoratzen ditu: «Gaztetasunak ematen duen ilusioa eta grina neukan eta lasterketa dezente irabaztea lortu nuen. Gaztetan, ez nuen arriskua ikusten. Hori bai, oso istripu gutxi izan nituen».

Euskal Herriko ia rallye guztietan parte hartu zuen Hoyosek eta bere Seat 124a oso ezaguna egin zen. Hori bai, orain dela urte batzuk BMW M3 E30 auto berriarengatik aldatu behar izan zuen: «Pena handia eman zidan Seat 124a uzteak, baina, egia esan, BMW berriarekin azkarrago ibiltzen naiz».



Inhar Hoyos, iloba eta kopilotoa

Patxi Hoyosek egindako auto aldaketaz ondo baino hobeto jabetu dira aurtengo Euskadiko Atzeko Kopan. BMW M3 E30 auto berria gidatzen emaitza bikainak lortzen ari da herriko pilotoa.

Autoarena, ordea, ez da denboraldiko aldaketa bakarra. Kopiloto berriarekin ari da aurten Patxi Hoyos. «Nire iloba Inhar hasi da kopiloto lanetan, eta bere lana oso ondo egiten ari da. Abiadura bizian joateari ez dio inolako beldurrik eta eman beharreko gomendioak azkar eta zuzen ematen dizkit».

Inhar Hoyos ere gustura dago bere lan berriarekin: «Rallyen mundua asko gustatzen zait, eta, hasi berria naizen arren, orain arteko lasterketetan gozatu egin dut», onartu du Hoyos gazteak. Izan ere, piloto sena odolean daramate Hoyos familian.