Oarsoaldeko Hitza

Bihar, manifestazioa izango da Errenteria-Oreretan «Euskal Herriaren aldeko hautua egin dugulako, independentzia eta sozialismoaren bidean», deialdia egin duten gazte independentistek azaldu dutenez.

Aste honetan bertan Errenteria-Oreretako eta Oiartzungo zortzi gazteren atxiloketa eta hauetako zazpiren espetxeratzea salatzeko ere izango da Zumarditik abiatuko den manifestazioa 18:30ean.

«Guk haien testigua hartu dugu eta Euskal Herriaren alde lanean jarraituko dugun gazte belaunaldi berria gara», adierazi zuten gazteek atzo Oiartzungo Kontzejupean egindako agerraldian.

Herritarren babesean

Aste honetan izan diren beste agerraldi eta mobilizazioetan bezala, gazte independentistek hamarnaka herritar izan zituzten aldamenean, deialdiarekin bat eginez.

«PSOEk proiektu independentista suntsitzeko helburu argia du», adierazi zuten gazteek, «eta proiektu hori errealitate bilakatzen duen mugimendu oro kolpatzen ari da».

Hala ere, «guk Euskal Herriaren aldeko hautua egin dugu», berretsi zuten.

«Aldaketa garaiak»

«Gure borroka kriminalizatuko dute, terroristak deituko gaituzte, gaizkileak garela esango dute, gauaren inpunitatean gure etxeetara armaturik sartuko dira, atxilotu eta espetxeratu egingo gaituzte, baina ez dute antolatzeko eta borrokatzeko grinarekin bukatuko», adierazi zuten agerraldi berean.

«Aldaketa» garaiak direla oraingoak ere azpimarratu zuten gazte independentistek, «nahiz eta atxilotu, torturatu, espetxeratu... irabazteko hautua egin dugu».

LABek ere bat egin du gazteen deialdiarekin

Oarso-Bidasoako LABek ere bat egin du gazte mugimenduaren deialdiarekin. Manifestazioan parte hartzeko deia egin du.