Oarsoaldeko Hitza

Dena prest. Atzerakontua bukaerara iristekotan da. Gaur, 20:00etan, txupinazoan ospatuko dute antxotarrek sanferminen hasiera. Suziriaren eztandarekin batera zapi gorriak lepoan lotu eta bost eguneko jai etengabean murgilduko dira antxotarrak, lesakarrei eta iruñearrei aurre hartuz.

Txupinazoa berezia izango da aurten. Herritarrak eta bisitariak Gure Zumardian bilduko dira jaien hasiera ospatzeko. Urtero legez, Juanjo Bujandak izango du suziria pizteko ardura, eta ohiturari jarraituz, erretzen ariko den puruaren errautsekin piztuko du suziria. Berezitasuna, baina, jaurtiketa lekuak emango dio aurten txupinazoari. Alkateordetzarik ezean, elizako goialdetik botako du aurten Bujandak suziria, eta haraino, Oier Iribarren eskalatzaile gazteak igoko dio etxafuegoa, ekitaldi ikusgarrian.

Herrian ez daudenak gogoan

Presoak eta errefuxiatuak gogoratuko dituzte jaiak hasi bezain pronto, Gure Zumardian bertan egingo den brindisean. Maider Ziganda alkatea eta Ander Poza alkateordea izango dira ekitaldian, senideekin eta herritarrekin batera, sanferminetaz gozatzeko aukera edukiko ez duten herritarrak gogoan.

Ondoren, jaietako lehenengo eguna izanik, koadrila gehienak mahaiaren bueltan bilduko dira iluntzeko derrigorrezko tragoxken ondotik. Modu horretan sabelak beteta ekingo diete herritarrek jaietako lehen gau luzeari.

Helduen danborrada irtengo da gauerdian, eta ondoren musika ez da faltako: Gozategi Gure Zumardian, Azokan DJ festa, Camp dantzaldia Axular plazan, eta gaztetxean, Toi eta The Wanba taldeak.

Festarako gune nagusiak

Sanferminek gune nagusi dezente izango dituzte aurten; feriak, azken urteetan bezala, Luzuriagako orubean izango dira; Axularren oholtza dago eta egunez eta gauez izango dira han ekitaldiak, baita Kexaldin eta Gaztetxean ere, plaza berean. Gure Zumardian, bi jai gune izango dira, Azoka inguruan bata, eta Zumardiaren bihotzean bestea, han izango baitira txosnak eta jaietako agertoki nagusia.

Aurtengo jaietarako berreskuratu den beste gunea, Biteri plaza izango da. Iazko etenaren ondotik, Pasaia-Lezo Lizeoko gurasoek bultzatutako Txabolsotoa atondu dute bertan berriro, eta egunero, ehunka lagun bilduko dira han afaltzera, baita jaietan zehar haurrentzako nahiz helduentzako antolatuko dituzten bestelako ekimenekin gozatzera.

Goizetan eta iluntzetan aldiz, Kupeldegi kalea izango da festaren ardatz, handik ibiliko direlako lasterka eguneroko bigantxak.