Oarsoaldeko Hitza

Jendetza bildu zen atzo Gure Zumardian sanferminen hasiera ospatzeko. Ikusmina piztu zuen jaien hasierako ekitaldiak, sekula ez delako antzekorik egin, eta ikusgarria ere suertatu zelako. Elizako goiko aldetik bota zuen Juango Bujandak suziria atzo, eta haraino, Oier Iribarren eskalatzaile antxotar gazteak igo zion etxafuegoa, Gure Zumardian bildutako guztien arreta bereganatuz. Kanpai dorrean, Alain eutsi gogor! leloarekin pankarta atera zuten.

Suziria eskuan, eta elizako kanpaiek zortziak zirela iragartzearekin batera, eztandarazi zuen Bujandak suziria, eta gainontzekoa berez etorri zen, berehalakoan: algarak, musika, eta nola ez, ur eta txanpain zorrotadak. Bitartean, Antxoko Musika Bandak Ramon Rodriguezek konposatutako Antxotarra martxa interpretatzeari ekin zion, eta jauzika eta pozik jarraitu zituzten kantaren konpasak oholtzan bildutako guztiek, zein Gure Zumardian bildutakoek.

Atzo, zumardiko oholtzan, Pasaiako alkate Maider Ziganda eta Antxoko alkateorde Ander Pozarekin batera, aurtengo sanferminetako protagonistak izan ziren; kantinerak, Sukaldari Nagusia, erretiratuen ordezkariak, Alkate Txikiak ...

Haurren gozamenerako, erraldoiak, Iñudea eta Mikeletea, han ziren baita ere, txupinazoan. Herritarrek egin antzera, erraldoiek baita ere txupinazoaren ondotik jarri zituzten zapi gorriak lepoan, eta hala ibiliko dira sanferminak bitartean. Barrutiari lehen bira, atzo eman zioten, txupinazoaren ondoren hain zuzen, buruhandiekin eta trikitilariek lagunduta. Pasai Txaranga ere, kalez kale izan zen, lehen orduei musika jarriz.

Preso eta errefuxiatuak gogoan

Txupinazoaren ondoren, herritarrak presoen eta errefuxiatuen aldeko brindisean bildu ziren, Gure Zumardian bertan. Jaietan egongo ez diren herritarrak gogoan, lore sortak jaso zituzten Imanol Iparragirre eta Balbino Saenz presoen senitartekoek.

Helduen danborrada

Urtero legez, helduen danborradak izan du sanferminetako lehen gaua girotzeko ardura. Atzo gauerdian irten zen beteranoen danborrada, eta jendetza izan zuten zain barrutiko espaloietan, danborrada noiz pasatuko irrikaz. Bi protagonista nagusi izan ziren, biak ere sanferminetako beteranoak; Jose Mari Rey Potxe Sukaldari Nagusia, eta Rita Papin kantinera.

Musika nonahi

Danborrarada bukatzerako gustu guztietarako musikarekin dantzatzeko aukera izan zen atzo Antxon; Camp dantzaldia Axularren, DJa Azokan, Gozategi Zumardian, rock latza gaztetxean, baita Larrain dantza ere, Oarso kalean.