Oarsoaldeko Hitza

Euririk egiten ez duen sanferminik ez dela inoiz izan diote Antxoko zaharrenek. Gazteenek berretsi egiten dute uste hori, urtero-urtero, sanferminetako egunen batean euria egiten duelako. Beraz, antxotarrek atzo goizean euria mardul erortzen ikusi zutenean, ez ziren batere harritu, ez eta arduratu ere. Besterik gabe, aterki zuri-gorria hartu zuten, eta egunaz gozatzera atera ziren, kalera. Halakoak dira sanferminak eta antxotarrak.

Hala ere, bero, eta giro handiarekin hasi ziren 2008ko San Fermin Jaiak herenegun. Izan ere, txupinazoaren ondoren, San Fermin II. Futbito Lehiaketako finala jokatu baitzen Usozen: bigarrenez, Kantxa Crew taldeak Tsunami mendean hartu zuen finalean, 2-1. Beraz, Tsunamikoen errebantxa gosea ez zen gauzatu. Zelaian izandako tentsioak eta gero, jokalariak denak elkarrekin tragoskak hartzera joan ziren. Halakoak dira ere bai sanferminak.

Gauean, dantzarako eta parrandarako bidea zabaldu zen dantzaldiekin. Helduen danborradak ere atera zen.

Goizera arte kalean iraun zutenek, sokamuturraz gozatzeaz gain, lehen euri tantekin lozorroa amatatu zuten. «Beno, euria. Eta zer? Sanferminak halakoak dira; euriak ere agertu behar du», esan zuen, atzo, goizeko 11:00etan, Antxoko okindegi batean gosaltzen ari zen gaupasazale batek.

Xaxorda, fenomeno

Atzoko protagonista, egunez, Xaxorda taldekoen desfilea izan zen. Busti ziren, bai, baina ez zien batere axola horrek. Haurrek ete Txabolsotoan gozatu ederra hartu zuten. Gauean, Basariko danborrada atera zen.