Oarsoaldeko Hitza

Larunbat honetan Gazte Eguna antolatu dute, laugarren urtez jarraian. Herriko hainbat gazteren eskutik egun osoan zehar primeran pasatzeko aukera izango dute herriko gazteek. Egun honen helburua da 1995 urtean zendu zen Ibon Zabala gaztea gogora ekartzea, eta gazte belaunaldi berriak elkar ezagutzea eta haien arteko harremanak bideratzea.

«Herriko gazteak elkartu eta ondo pasatzea da helburua, orain dela lau urteko Gazte Egunarekin hasitako ibilbidearekin jarraituz», azaldu dute antolatzaileek. Ekimen ugari antolatu dira horretarako: tailerrak, bazkaria, kontzertuak...

Bertan parte hartzeko zapi berdeak jarri dituzte salgai herriko zazpi tabernetan, 12 euroko prezioan: Landare; Maiaritz; Gailur; Sindikato; Manuel; Arkaitza eta Oñatiarra. Zapiak Gazte Eguneko ekimenetan eta bazkarian parte hartzeko aukera emango du. «Batik bat gazteei zuzendutako ekimenak prestatu ditugu, baina gainerako herritarrentzako ere irekita daude», azaldu dute herriko gazteek.

1995eko Gazte Egun hura

Duela lau urte ekin zitzaion Gazte Eguna antolatzeari herrian, 1995eko Gazte Egunaren 10. urtemuga zela baliatuta. Izan ere, 1995eko Gazte Egun hartan Euskal Herri osoko gazteak bildu ziren Errenteria-Oreretan, gazteen aurkako «errepresioa salatu eta gazte antolakuntzaren balioa» aldarrikatzeko.

Baina aurreikusi baino lehen bukatu zen Gazte Egun hura, Ibon Zabala herriko gazte ezagunaren heriotza gertatzean. Egunaren antolakuntzan lanean ari zela zendu zen deskarga elektriko baten ondorioz. Hala, Ibon Zabala gogoan, berriz ere Gazte Eguna antolatu zuten duela lau urte.